MNF-in zu zawrh duh loh lantir nan Naktukah kawng an zawh dawn

MNF chuan naktuk hian Mizoram hmun hrang hrangah 'Zu zawrh duh lohna kawngzawh' an huaihawt dawn. Kawng an zawh tur chhan turte chu nimin khan Aizawl Press Club-ah thuthar thehdarhtute an hrilh.

MNF senior vice president Tawnluia chuan, Kristian kan nih hnuah khapna dan awm hranpa lo mah se, mi tam berte zu lakah an fihlim nia sawiin, "UT sorkar hmasa ber Mizo Union leh Congress inchhûn fin sorkar laiin kum 1973 khan phalnain Mizoramah zu zawrh a ni. Kum 1984 khan Congress a sorkar leh a, kum khat a tlin hma August 8, 1984-ah zu zawrh phalna an pe leh a, kum 1987-a MNF sorkar hnu rei lo têah zu permit tihtawp a ni. Chumi hnuah Congress sorkar bawkin kohhran leh NGO-te ngenna palzûtin January 15, 2015 aṭangin sorkar phalnaa zu zawrh leh a ni," a ti.

Tawnluia sawi danin, MNF-in January-August 2016 chhunga Aizawl khawpuia MLA bial 11 an zir chianna aṭangin, zu kaihhnawih vanga thi mi 500 chuang an awm tawh a ni.

Zu vangin Mizoram a tluchhe mek nia sawiin Tawnluia chuan, "Kan ram chhan chhuak tur hian kan party chuan hma a la tawh a, a ṭang zui zel dawn. Zu chhiaha sorkarin sum a lak luh aia tam zu kaihhnawiha damlo enkawlna senso a ngai tih hi thil chiang sa a ni. Zu hi chhungkaw tam takin kan chhiat phah mek a, ṭhalaite'n an tuar nasa hle," a ti. Kawng an zawh tur chu zu zawrh titawp tura hmalakna pakhat a nih thu sawiin, mipuite
ṭawiâwm turin a sáwm.

MNF-te hian Aizawlah chuan chawhma dar 11 aṭangin Chanmari kâwn aṭangin kawng an zawh ṭan dawn a, hmun ṭhenkhatah dingin, MNF hruaitute'n thu an sawi ang a, a tàwpna Vanapa Hall kawtah MNF president Zoramthanga'n thu a sawi ang. Kawngzawh hi district khawpui tinah huaihawt tum a ni.