Mizoram páwnah Hna zawn ngam a ṭul - Joseph Lalhimpuia

Mizo Students Union, Shi­llong chuan nimin khan U So So Tham Auditorium-ah Fresher Social an hmang a, Parliamentary secretary (School Education) Joseph Lalhimpuia'n hmanpuiin, Mizo ṭhalaite'n Mizo­ram páwnah hna an zawna an thawh ngam a ṭul tawh thu a sawi.

Joseph Lalhimpuia chuan, Mizoram páwna Mizo zirlaite chu tun hma aiin hnam dang zirlaite nen inpawhna pawh an nei
ṭha tawh zawka a hriat thu sawiin, "Mizoram páwnah Mizo zirlai tam tak an awm a, Mizoram páwna hna thawh tur zawng ngam kan mamawh a ni," a ti.

School Education de­part­ment hmalakna sawiin, Educations Reforms Com­mis­sion rawtna zuiin, kum 2015 aṭangin zirtirtu zawng zawng training an neihna turin hmalak a nih tawh thu a sawi a, "Primary school leh middle school zirtirtute training pek mek an ni a, Science leh Mathematics zirtirtu indaih loh phuhrûk nan heng subject teacher lakna tur Recruitment Rules duan a ni," a ti a; RR hmang chuan kum tirah zirtirtu eng emaw zat lak a nih thu a sawi.

Mizorama zirlaibu in­ang lo hman ṭhin chu de­partment-in ṭha lo a tih avangin primary school aṭanga bul ṭanin, zirlaibu inang hmang tura rua­hmanna siam a nih thu a sawi a; tunlaiah inelna a sàn tawh thu sawiin, "India state danga zirlaite el phak tura ṭan kan lak a ngai a, Central service-a tling thar turin zirlaite'n theihtawp kan chhuah a ngai a ni," a ti.

Shillong MSU Freshers So­cial-ah hian Shillong-a Mizo zirlaite leh Mizo pawl hrang hrang hruaitute an tel a; khualzahawm, Vanneih­tluanga, Lengzem editor-in fuihna thu a sawi bawk.