Kum 2015-ah e-district hmangin Document 36,660 lak chhuah a ni

Kum 2015 chhung khan e-District hmangin lehkha pawimawh 36,660 pek chhuah a ni. e-District hi district khawpui pan kher ngai loa sorkar lehkha pawimawh lak chhuah theihna a ni.

e-District hmang hian sorkar
aṭangin lehkha pawimawh hrang hrang - tribal certificate, income certificate, residential certificate leh apna portal-te lak chhuah theih a ni a; a buaipui turin thingtlang khaw hrang hrangah Rural Information Kiosk (RIK) leh Common Service Centre (CSC) an awm.

Thu dawn danin, RIK leh CSC-ahte hian sorkar lehkha pawimawh la chhuak duhte'n an awmna district khawpui pan kher ngai loin online hmangin an dil thei a; Mizorama district pariat zingah Champhai district chu kum 2015 chhunga RIK leh CSC hmanga sorkar lehkha pawimawh lak chhuah tamna ber niin, mi 11,418-in an la chhuak a ni.

RIK leh CSC aṭang hian kum 2015 chhung khan Aizawl district-ah mi 11,204, Serchhip district-ah mi 4,842, Kolasib district-ah mi 4,205, Lunglei district-ah mi 3,388, Lawngtlai district-ah mi 1,231, Mamit district-ah mi 355 leh Siaha district-ah mi 17-in lehkha pawimawh an la chhuak bawk.

RIK hi Mizorama khua/hmun 300-ah a awm tawh a, CSC chu 136 a awm thung. CSC 136 zinga 120 chu bun fel a ni tawh a, la bun loh 16 a awm a ni.