Picnic leh a huhoa thil tihkhawmte Ti lo turin Health Minister-in ngen
All India Radio (AIR), Aizawl Station chuan nimin khan an pisa tualah thawktu mi 168-te Covid-19 laka an la him vek avang leh tluang taka an hnate an thawh zel theih avanga lawmthu sawina inkhawm an buatsaih a; khuallian, Health minister Dr R Lalthangliana chuan, Krismas leh kum thar vuakvêtah picnic leh a huhoa thil tihkhawm dangte ti lo turin mipui a ngen.
Dr R Lalthangliana chuan Covid-19 lêng vanga harsatna thleng sawiin, "Mizote hi inchibai hnam kan ni a, kan inchibai thei ta lo. Zaikhawm leh inkhawm ngaina hnam kan ni a, kan ti thei ta lo. Krismas-ah pawh ruai kan ṭheh thei dawn lo a, a khawhar thlak hle dawn a ni," a ti a; Mizorama Covid-19 vei zinga thi pasarih chiah an awm chu state dangte dinhmun thlirin tlem mah se, chapopui theih an ni lo tih sawiin, "Chung lam hnathawh a ni. Pathian malsawm tlaka kan thawh a ngai," a ti.
Covid-19 dona atan Chief Minister-in sum awm ang hman a phal nia sawiin R Lalthangliana chuan, "A hoin department zawng zawng nen, kohhran, NGO leh mimal thlengin kan ṭang rual ṭha hle a ni," a ti a; kum tharah Covid-19 vaccine pek chhuah a nih pawhin, kut sil fai ṭhat, hmai tuam leh inhnaih lohte a la pawimawh zel dawn thu a sawi.
Health Minister chuan, kumin Krismas vuakvêtah picnic leh a huhoa thil tihkhawmte insûm turin mipui a ngen a, "Kuminah chuan biak-in thleng pha ngai lo tam takte chhungkuain ṭha takin i hmang ang u," a ti.
Mizoramah sorkar laipui pisa eng emaw zat a awm tih sawiin Minister chuan, "Central office pawimawh tak tak Mizorama awm MZU, AIR, PIB, DDK, Post & Telegraph, etc. te hi department dang angin ka en thei lo a, Mizoram sorkar pawh hian mahni ta ang hliah hliahin kan en a ni," a ti a; harsatna an nei a nih chuan sawi hreh lo turin a chah.
AIR, Aizawl director DR Lalropuia chuan, kum tam Pathianin AIR leh thawktute a hruai tawhnaah lawmthu an sawi fo tawh tih a sawi a ni.