MJA-in Krismas thilpek an hlân

Mizoram Journalists' Association (MJA) chuan Charity Fund an thawh khâwm aṭangin nimin khan Civil Hospital, Aizawl (CHA) Poor Fund-ah Krismas thilpek atan Rs. 30,000 an pe a; MJA president Zonunsanga Khiangte-in medical superintendent Dr Lalhmuchhuaka hnenah a hlân.

Thilpek hlanna inkhawm hi CHA Medical Superintendent pisaah neih a ni a; MJA President chuan, kum tina Charity Fund an thawh khawm ṭhinah, Mizoram páwna Mizo damlote'n an pan nasat khawpuia Mizo welfare-te hnenah an pek tel ṭhin thu sawiin, "Kuminah chuan Covid-19 léng kaihhnawihah chanchinbumite eizawnnain a tuar nasa a, kan member zinga khawsak harsa zual deuhte tuamhlâwm lam kan hawi tel a ni," tiin, MJA member-te an inpuihna bâng chu CHA tan an hlan thu a sawi.

CHA medical superintendent Dr Lalhmuchhuaka chuan, an damdawi-in chu Covid-19 vei ni lo, damlo dangte enkawlna a ni chungin kum 100 dana lêng hripui laka himna tura a dotu zingah an tel thei leh ngaihtuahna séng theia an awm ve chu vannei inti zawk turin thawktute an infuih ṭhin thu a sawi a; "Thawktu zingah hripui kai pali an awm tawh. Damdawi-ina inentir tur mi sang chuang kan lo enfiah tawhah hri kai mi 18 kan hmu chhuak tawh," tiin, hri kái an hmuh chhuahte chuan mi dang an kài hman loh vek thu a sawi.

Civil Hospital, Aizawl hotute chuan, Poor Fund-ah kum dang angin puihna sum dawng tam lo mah se, a dawngtu nih ngawt loh ṭha an tih avangin MJA Charity Fund-ah Rs. 10,000 an hlân lêt ve leh nghal a ni.