COVID-19: Mizoram dinhmun Hripui vei mi 9 hmuh belh a ni

December 21, Thawh­ṭanni khan Mizoramah Covid-19 vei mi pakua hmuh chhuah a ni a, an zingah Mizoram chhunga kái chhâwng mi paruk an awm. Nimin khan hripui laka fihlîm tawh mi 13 chhuahtir an ni thung.

Covid-19 vei hmuh thar pakuate chu mipa pasarih leh hmeichhia pahnih an ni a; ZMC laboratory-ah mi pa­thum, TrueNAT-PCR hmangin mi pakhat leh Rapid Antigen Test (RAT) hmangin mi panga hmuh a ni.

Nimin khan Covid-19 laka fihlîm tawh mi 13 chu enkawlna hmun aṭangin chhuahtir an ni a; Aizawl district-ah mi pariat, Serchhip district-ah mi pathum leh Lawngtlai district-ah mi pahnih an chhuak.

Mizoramah swab sample 1,72,481 endik tawh aṭangin Covid-19 positive mi 4,133 (2.40%) hmuh chhuah a ni tawh a, mipa 3,041 leh hmeichhia 1,092 an ni. Nimin tlai dar 5 thleng khan mi 3,986 (96.44%) chhuahtir an ni tawh a, mi pasarih (0.17%) thi tawhin, enkawl mek mi 140 (3.39%) an awm.

Mizoramah Covid-19 positive mi 4,133 hmuh chhuah tawh a ni tawh a, chu'ng zinga mi 1,959 chu Mizoram chhunga kái an ni a, mi 2,174 chu state páwn aṭanga rawn lût an ni.

December 21, Thawhṭannia Covid-19 vei hmuh chhuah mi pakuate chu swab sample endik zat 1,176 aṭangin 0.76% a ni a; ZMC Covid-19 laboratory-ah mi 393, TrueNAT-PCR hmangin district pasarihah mi 90 leh RAT hmangin district 10-ah mi 693 endik a ni.

Covid-19 positive hmuh thar mi pakua zingah natna (Covid-19 symptom) lang chhuak pakhat a awm a; Mizoram chhunga hri kái paruk awmin, chu'ng zinga pakhat chu hri a kàina hriat a ni lo.

Sorkar thuchhuah tarlan danin, ZMC laboratory-a hripui vei hmuh chhuah pathumte chu mipa pahnih leh hmeichhia pakhat, Aizawl district-a mi vek, kum 31-46 inkar an ni a, Covid-19 symptom nei an awm lo. An zinga pahnih chu Mizoram chhunga kái nia hriat an ni a, mi pakhat erawh chu tun hnaia state páwn aṭanga rawn lut a ni thung.

RAT hmanga Covid-19 positive hmuh thar mi pangate chu mipa pali leh hmeichhia pakhat an ni a, an zingah naupang kum 8 mi pakhat a tel a, mi dang zawng puitling an ni. An zinga mi pali chu tualchhunga hri kái an ni.

Falkawn - 2: Mipa kum 31 & 46; Silchar lam mi, ZMC building sak hna thawktute zinga mi, tualchhunga kái, symptom nei lo ve ve.

Dinthar - 1: Hmeichhia kum 37, Shillong aṭanga haw, home quarantine lai, symptom nei lo.

Kawnpui - 1: Mipa kum 25, tun hnaia Shillong aṭanga haw, quarantine facility-a awm mek, symptom nei lo.

Seling - 1: Mipa kum 32, Allahabad, UP aṭanga haw, Lengpui Airport screening point-a hmuh chhuah, symptom nei lo.

Lunglei Venglai - 1: Mipa kum 28, Aizawl aṭanga zin haw, hri kàina hriat loh, symptom nei lo.

Lawngtlai AOC Veng - 1: Mipa kum 22, tualchhunga hri kái, symptom nei.

Mampui - 2: Mipa kum 20 leh hmeichhia kum 8; tualchhunga hri kai, symptom nei lo ve ve.