Bazar sak ṭhat tur tlawh

Vaivakawn Bazar sak ṭhat tur chu February 18, Thawhlehni khan Commerce & Industries minister F Rodingliana leh bialtu MLA Lalnghinglova Hmar, minister of state-ten an tlawh a, vengpa W Chhuanawma, govt. deputy chief whip leh official-te'n an ṭawiawm.

F Rodingliana chuan, Vaivakawn Bazar building sak chu sak ṭan aṭanga kum khat chhunga zawh hman tum a nih thu sawiin, "A zar zotu tur chu mipui an ni," a ti a; department leh khawtlang hruaitute chu a hun taka zawh a nih theih nan ṭangrual a, inpawh tlang taka hma laho turin a chah.

Bazar sak tur enfiahnaah hian bazar building thar ban thlang lam phunna tur en a ni a, footpath awm mekna sir lam Joint YMA Field ko hnaih lamah phun tura ruahman a ni. Joint YMA Field pan thlakna footpath awm sa chu two wheeler kal theih tura siam dan tur leh in sak thar tur chu kawngpui aṭanga a hla thei ang bera sak a nih theih dan turte en nghal a ni bawk.

Vaivakawn Bazar sak ṭhatna tur atan hian SASCI Part-V aṭangin cheng vbc. 25.35 hmuh a ni a, PWD-in an sa dawn a ni.