KHAWTHLIR

State Day of Prayer

Vawiin hian Mizoram hmun hrang hrangah State Day of Prayer hman a ni dawn. State Day of Prayer hi Aizawlah chuan Lammualah hman tur niin, chawhma dar 11-ah ṭan a ni dawn a, chief minister Lalduhoma leh Bethel Ministry speaker Fredrick Lalrindika ten thu an sawi dawn bakah, ṭawngṭairualna hun hman a ni ang. State Day of Prayer thupui chu 'I ram lo thleng rawh se' tih a ni.

MRB-in pawisa pe

Mizoram Rural Bank chuan kumina Chapchar Kût hmanna atan nimin khan Chapchar Kût Organising Committee hnenah Rs 1,00,000 an hlan. Pawisa inhlanna hi MRB Head Office-ah neih a ni a, MRB general manager Revise L Pachuau-in Chapchar Kût Organising Committee secretary Prof. Malsawmliana hnenah a hlan a ni.

DIG-in tlawh

DIG (NR) C Lalthanmawia chhuan February 18, 2025 khan Kolasib district a tlawh a, Kolasib SP pisaah police hotute leh MJA Kolasib district-te nen an inkâwm. C Lalthanmawia chuan, police-te tan ram leh hnam hmangaihna rilru pua thawh a pawimawh thu sawiin, police indaih lohna avangin khawtlang leh tlawmngai pawlte nen thawhhona ṭha neih a ṭul thu a sawi.

Training buatsaih

Siaha DC office leh Mizoram Social Defence & Rehabilitation Board chuan nimin khan Nasha Mukt Bharat Abhiyan (NMBA) hnuaiah 'Training of the Trainers Programme on Drug Abuse Prevention for Master Volunteers and Nodal Teachers/NGOs’ an buatsaih a; district bawrhsap VL Hruaizela Khiangte, District NMBA chairman-in a hmanpui.

Rawng inang tur

State Transport Authority (STA) chuan thuchhuah siamin, two wheeler taxi-te chu rawng vár leh sticker bel dan inang vek hman tur a nih thu a tarlang. STA chuan, two wheeler taxi rawng tura duan (a var) chu register thar tur zawng zawngte'n zawm nghal tur a nih thu an tarlang a, "Two wheeler taxi register tawh, tuna tlan mekte chuan he hriattirna chhuah aṭanga thla ruk chhungin an lirthei rawng an thlak hman tur a ni," an ti.

Thawhho dan tur sawiho

Lawngtlai DC Cheemala Siva Gopal Reddy kaihhruaiin nimin khan a pisaah Health & Famliy Welfare department leh District Hub for Empowerment of Women aiawhte an ṭhukhawm a, thawhho theih dan tur an sawiho. PMMVY leh JSY chak zawka kalpui turin bank account nei lote tan chak zawka hmalak ni se, VC leh NGO-te ṭha zawka thawhpui ni se, One Nation One Helpline Rally chu February 21, 2025-ah hman ni se, an ti.

PM Viswakarma

Commerce & Industries department, Lawngtlai DC office leh sorkar laipuia Development and Facilitation Office Branch MSME chuan DC conference hall-ah 'Prime Minister Vishwakarma Scheme chungchang inzirtirna an buatsaih a, additional DC Zoramsiama Hmar-in a hmanpui. PM Viswakarma Scheme hi thingtlang leh khawpuia kutthemthiamte ṭanpui leh hamṭhatna pek bakah, hralhna ṭha zawk zawnsakna tura hmalakna a ni.