Cheng vbc. 61.68 hu ruihhlo halral

Champhai district bawrhsap VL Remliana chuan nimin khan April 2023 - May 2024 chhunga Champhai Police-te ruihhlo man sa, Rs 61,68,28,315 man hu chu Champhai District Hospital thil halralna (incinerator)-ah a halral.

Champhai Police-te ruihhlo man, nimina halralte chu - heroin kg 26.135 (Rs 7,84,05,000 hu), methamphetamine kg 84.97 (Rs 11,04,61,000 hu), crystal methamphetamine kg 14.261 (Rs 42,78,30,000 hu) leh ganja kg. 26.463 (Rs 1,32,315 hu)-te a ni a; he'ng ruihhlo man kaihhnawihah hian Champhai Police-te chuan NDPS Act hnuaiah thubuai 79 an ziaklut a ni.

VL Remliana chuan, Champhai Police-te hmalakna leh inpekna fakawm a tih thu a sawi a, "Ruihhlo man hi tam hle mahse, man loha kaltlang tam tak pawh a awm dawn a, a do zelna kawngah tlawmngai pawl, khawtlang mipui leh dan kengkawhtute an ṭanrual hle a ngai a ni," a ti a, tha thlah loa theihtawp chhuah zel turin a chah.

Champhai SP Shivendu Bhusan pawhin thu sawiin, Champhai District NCORD member-te bakah sorkar hotu te leh Sub Hqrs YMA hruaitute an tel.