HPC(D)-in inbiakpuia sawmna Sorkarin a pawm lo: Home Minister

Home minister R Lalzirliana chuan, HPC(D)-te'n intiamkamna neia inbe turin Mizoram sorkar an sáwm a, mahse sorkarin a pawm lo niin a sawi.

July 3, 2015 zana thuthar theh­darhtu ṭhenkhatte'n Bawng­kawn Police Station-a an kawmnaah Home Minister chuan, HPC(D)-te'n tun hnai khan Mizoram sorkar chu inbiakpuiah an sáwm tih sawiin, "HPC(D) hian Indian Constitution-a Sixth Schedule hnuaia inbiak an duh thu an rawn thlen a, inbiaknaah chuan pawl pathum - Mizoram sorkar, HPC(D) leh sorkar laipui aiawhte tel se tih an rawt a ni," a ti.

R Lalzirliana chuan, tun hma lama inbiaknaah inbiak dan tur chungchang leh intlawhkhalhna siam a awm ngai lo tih sawiin, HPC(D)-te'n intiamkamna awm saa inbiakna neih an rawtna chu Mizoram sorkarin a pawm thei lo tih a sawi.

Excise & Narcotics minister Lalzirliana chuan, Mizoram Liquor (Prohibition and Control) Act hman a nih hnuah mi ṭhenkhat hlauhthawn angin zu rûi leh buaina siam an tam lo niin a sawi a, "MLPC Act hman hnuah Mizote'n zu in an thiam ṭan a ni," a ti.

Home Minister ho hian parliamentary secretary Lt.Col. ZS Zuala, Aizawl SP C Laldina, Excise & Narcotics deputy commissioner Ngurchungnunga Sailo leh Police leh Excise officer-te'n July 3 zan khan Aizawl khawpui an fang kual a; Ngaizel, ITI Veng thlanga World Bank Road, Vanapa Hall bul leh Canteen Kual, Vaivakawn, Hunthar Veng, Edenthar Veng, Chaltlang North leh Bawngkawn te an tlawh a ni.