Assembly session tan hmaa Bill thehlut hma tura ngenna an zâwm ṭha tawk lo

Naktuk, July 7 hian Assembly session ṭan tur a ni a, July 9 thleng neih a ni ang. Session neih turah hian Parliamentary Affairs department-in bill thehlût hma tura sorkar department-te a ngenna chu department-te'n an zâwm ṭha tâwk lo niin Assembly Secretariat official-te chuan an sawi.

Assembly Secretariat aṭanga thu dawn danin, Assembly session-a ngaihtuah turin sorkar bill pakhat a lut tawh a, bill dang pawh a luh belh rin a ni. Bill thehlut hma tur hian Parliamentary Affairs department chuan sorkar department-te tan hriattirna a lo chhuah fo tawh a, a hlawhtling lo hle. Bill a luh tlai vang hian Assembly Secretariat-a thawkte an buai zual phah a, office chawlh ní-ah pawh an kal dawn a ni.

Bill a luh tlai vang hian Assembly hnathawkte'n session hmaa mipuiin an lo thlir lâwk tura puan­zarna hun an nei leh dawn lo. Session leh session inkarah, engtik hunah pawh Assembly House lam chuan bill an dawng thei reng a, mahse sorkar department-te'n thehlut hma loin, session dawn ṭêpah chawpchilh taka an thehlut ṭhin avangin bill pass ṭhenkhat chuan duhthu a sâm loh phah niin an sawi.

Rules of Procedure and Conduct of Business in Mizoram Legislative Assembly-a Chapter XIV-ah chuan, sorkar department-in bill an siam chu House-a MLA-te'n an ngaihtuah hmain, mipuiin rawtna leh sawiselna an neih theih nan Assembly lamin an thehdarh tur tih a ni. Assembly-in an thehdarh hnuah mipuiin an ngaihdante chu House-ah ziakin an thlen ang a, MLA-te'n an ngaihtuah hunah mipui rawtna leh sawiselna chu thlir tel theih a ni.

Assembly session neih turah hian July 3, 2015 thleng khan starres question 70 leh unstarres question 30 a lut tawh a, Speaker hoa an enfiah hnuah ziaka chhan chi zawhna pariat leh ṭawngkaa chhan chi zawhna pahnih an hnawl.