Environment humhalh hi sakhuana a ni - Chief Justice of India

Mizorama ni hnih cháma rawn zin Chief Justice of India (CJI) Justice Sharad Arvind Bobde chuan, environ­ment humhalh beihpui thlâk chu mihring dam khawchhuahna nena inzawm tlat, sakhuana a nih thu a sawi.

Chief Justice of India hian December 21, Thawhṭanni tlaia a puala Assembly Annexe conference hall-a 'Meet on Green Mizoram' tih buatsaihah thu a sawi a, "Environment humhalh beihpui hi mihring dam khawchhuahna nena inzawm tlat, sakhuana a ni. Sakhua hian mihringte a phuar khawm ang bawkin, environment humhalh beihpui thlak hian khawvel hmun tina mite a phuar khawm a ni," a ti.

Justice Sharad Arvind Bobde chuan, environment humhalh kawngah Mizo mipui fakin, "Mizo mipuite'n environment in humhalh ṭha te, ram pumah forest area nei ṭha ber zinga mi in thei leh, kum tin Green Mizoram Day puala thing phun leh a enkawl zui hna in thawk ṭhinte hi a chhuanawm hle a ni," a ti a; thing leh mau, lui leh nungcha humhalh chu Mizote nunphung leh ziarángah a bet tlata a hriat thu a sawi.

Chief Justice chuan, mihring nunna atan a pawimawh êm avangin dan hmanga roreltu judiciary chuan a theih chin chinah environment humhalh an kengkawh tur thu a sawi a, "Environment hian khawvela mihring chhuan lo awm tawh, awm mek leh awm zel turte a nghawng dan a intluktláng vek a ni," a ti.

Chief minister Zoramthanga pawhin thu sawiin, Mizoramin sik leh sá, thing leh mau, lui leh nungchate humhalhna turin kum eng emaw zat kal tawh aṭangin Green Mizoram Day kum tin hman ṭhin a nih thu a sawi a, "Environment humhalh a pawimawh tluk zetin mipui ei leh bar, sum leh pái thawh chhuah dan tur ngaih pawimawh a ṭul," a ti a; environment humhalh leh economy siamṭhat chu kal kawp tlat tur a nih thu a sawi.

Mau chungchang sawi langin Chief Minister chuan, "Thla rei lo tê chhunga puitling thei, boruak tihthianghlimna atana ṭangkai, suma chantir theih ni bawk si a nih avangin Mizoram sorkarin hemi kawngah hian chak takin hma a la mek a ni," a ti.

Inkhawmah hian Law & Judicial minister TJ Lalnuntluanga, Gauhati High Court judge pahnih Justice Michael Zothankhuma leh Justice Nelson Sailo, Mizoram PCCF Jitendra Singh leh Central YMA president Vanlalruata te pawhin thu an sawi a ni.

Chief Justice of India hian nimin khan Mizo Village, Reieka nungcha, thing leh mau humhalhna atana Mizoram State Legal Services Authority buatsaih lungphum a phum bakah Reiek Cleanliness Drive a vailiam. Vawiin hian Mizo­ram a chhuahsan ang.