Pharsih luiah sangha chi thar hmuchhuak

Pachhunga University College (PUC) Zoology department-a mi Dr Lalramliana, Mizoram University-a Environmental Science department-a mi Samuel Lalronunga leh Dr Lalnun­tluanga te leh leh Lee Kong Chian Natural History Museum, National University of Singapore- mi Heok Her Ng-te chuan Kawlbêm dáia Pharsih luiah sangha chi thar an hmu chhuak.

Sangha chi thar hmuh chhuah hi cat-fish chi khat a ni a, a hmingah PUC-a field assistant Vanlalmalsawma hming chawiin ‘Exostoma sawmteai’ an vuah. Sangha chi thar hmuhchhuah thu hi July 3, 2015 khan ‘Ichthyological Exploration of Freshwaters’ Journal-ah chhuah a ni.

Sangha chi thar hmuchhuaktute chuan, sangha chi thar hmuhchhuah thuah inhnialna a awm fo tih sawiin, "Hmuhchhuah tak hi sangha thar ni loin, sangha chi (species) thar a ni a. Tun hmain sangha chi hran a nihna hriat a ni lo a, chi thar a nihna hmuhchhuah hnuah a hming vuahin, khawvela hriatah puan darh a ni ta tihna a ni," an ti.