KHAWTHLIR

Thisen pe
Central South Division SAY Council bultum­in Salvation Army kum 150-na lawm nan Aizaw­l city area leh Aibawk CO bial SAY-te chuan Inrinni khan Aizawl Civil Hospital tan thisen unit 142 an pe a, a petute mipa 123 leh hmeichhia 19 an ni. Sihphir Branch KṬP pawhin an branch diamond jubilee lawm nan Inrinni khan Synod Hospital-ah thisen unit 39 an pe a, a petute mipa 32 leh hmeichhia pasarih an ni.

PUC châwl lo
Vawiin hi MHIP Day a ni a, Mizoram sorkarin chawlhah puang mah se, Mizoram University-in chawlhah a puan loh avangin Pachhunga University College chu an châwl dawn lo a, zirlaite college kal vek turin an hriattir.

Pass lawmpui
Lengpui MSU-te chuan Inrinni khan an khua aṭanga kumin HSLC leh HSSLC pass tharte lawmpuina hun an buatsaih a, bialtu MLA John Rotluangliana'n a hmanpui. Minister John Rotluangliana chuan, zirlaite chu ram chhung­ah chauh ni lo, India ram hmun dang leh ram páwn thlenga hna thawh tur zawng ngam turin a fuih.

Dictionary sem
CodNerc leh Khawzawl Students Association chuan July 3, 2015 khan Khawzawl Zaingen community hall-ah pocket English dictionary an sem a, zirlai 50 hnenah an pe. Pocket dictionary semna inkhawmah hian CodNerc chairman B Lalchhanzova'n thu a sawi a ni.

Damdawi-in tanpui
Home Missions School chuan July 3, 2015 khan Aizawl Civil Hospital-ah damlo inentirte ṭhutna tur, ṭhutthleng sei ṭha chi 20 an pe a, Rs. 1,60,000 man a ni. ACH Poor Fund-ah Rs. 30,000 an pe bawk.

Heroin man
SRS-te chuan July 3, 2015 zan khan ITI Venga in pakhatah heroin gram 9 an man a, a neitu Lalzirliana (30) s/o Rikhuma, Myanmar nia insawi an man bawk. Ruihhlo an man hi Rs. 45,950 hû a ni a, Excise & Narcotics department hnenah an hlan.

Missionary Sunday
Nimin, Pathianni khan Mizoram Baptist Kohhrante chuan 'Mis­sio­nary Sunday' an hmang a, thupui chu chawhmaah 'Chanchin ṭha mi tin tan' tih leh zanah 'Ṭawngṭai leh thipeka mission rawngbawlnaa tel hi kan vaia mawhphurhna a ni' tih a ni. BCM hian July thlaa Pathianni hmasa ber hi Missionary Sunday atan an hmang ṭhin.

Ruihhlo Dona Ni
Salvation Army-te chuan nimin khan biak-in tinah Ruihhlo Dona Ni an hmang a, ruihhlo ṭhat lohzia inzirtirna bakah, ti lo tura intiam tharna hun an hmang. Salvation Army kum 150-na an lawm mek a, a lawmna pui ber London-ah hmannaa tel turin Mizoram aṭangin mi 51 an kal. Salvation Army hi William Booth-a'n June 2, 1865-a a din a ni.

Hospital Sunday
Mizoram Presbyterian Kohhran chuan nimin khan Health Sunday leh Hospital Sunday an hmang a, thupui chu 'Heng mi tê ber chunga in tih chu ka chunga ti in ni' tih a ni. Chawhnu inkhawmah Health Sunday an hmang a, zan inkhawmah Hospital Sunday hmangin, Synod Hospital pualin thilpek an lakhawm a ni.