Income hriatpuina dik pe turin VC/LC chah

Aizawl Bawrhsap pisaa Judicial Branch chuan, local council leh village council-te hnenah lehkhathawnin, a dawng tur dik takte chauhin scholarship an dawn theihna atan annual income hriatpuina dik taka pe chhuak turin an hriattir.

Aizawl DC office chuan, local council leh village council-te chu mahni khua leh tuite chhungkaw sum lak luh hre thei ber tura ngaih an nih thu sawiin, "Hriatpuina pek chhuah dáwnah a diltu nu leh pa emaw, pasalte sum lak luh chauh tarlan tur a ni. Chhungkaw member dangte income chu chhiar tel tur a ni lo," an ti a; annual income pek chhuah dik loh a nih chuan dan anga action lak theih a nih thu an sawi.

Thu dawn danin, Mizoram Scholar­ship Board chuan danin a phût chin aia tam sum la lut zingah scholarship dawng an tam avangin, DC tin hnenah income certifcate pek chhuah kawnga fimkhur tura ngenna an thawn a ni.

Scholarship dawng theite chu:

Post Matric Tribal Scholarship: Parent/guardian kum khata sum lak luh Rs. 2,50,000 aia tam lo.

Minority Scholarship (under matric): Parent/guardian kum khata sum lak luh Rs. 1,00,000 aia tam lo.

Minority Scholarship (post matric): Parent/guardian kum khata sum lak luh Rs. 2,00,000 aia tam lo.