SRS-te man khawm Nuai 19 chuang man ruihhlo hâl ral

Central YMA hnuaia Supply Reduction Service (SRS)-in ruihhlo chi hrang hrang an man, cheng nuai 19 chuang man chu July 4, 2015 zing khan CYMA pisa tualah an hâl ral.

Ruihhlo hâl hmain Central YMA Hall-ah inkhawm tawitê neih a ni a, CYMA vice president leh SRS chairman Vanlalrema Rokhum-in a kaihruai. Chumi hnuah ruihhlo an man sate chu hâl a ni a, Mizoram Kohhran Hruaitute Committee (MKHC) chairman Rev. Lalrinmawia'n a dep kai a ni.

Rev. Lalrinmawia chuan, ruihhlo do kawngah kohhran leh tlawmngai pawlte an thawh dun thiam a ṭul thu sawiin, "Mizorama ruihhlo lut tihtlem kawngah kohhranin tih theih nei tlem mah se, ruihhlo ngai enkawl kawngah nasa takin ṭan a la a ni," a ti.

MKHC Chairman chuan, SRS awm hmasak laia ruihhlo an do danah sawiselna a awm vanga SRS tihtawp a nih hnuah ruihhlo leh ruihhlo ngái an pung niin a sawi a; kohhran leh tlawmngai pawlte'n ruihhlo do leh a ngawl veite chhanchhuahna tura ṭan an la chu state dangte pawhin Mizoram an awh chhan pakhat niin a sawi bawk.

CYMA president Lalbiak­zuala pawhin thu sawiin, YMA-in ram dinhmun thlir chung leh mipuite ngenna vangin ruihhlo a do leh tih a sawi a, "Kohhran leh mipuite ṭawngtaina avangin Pathianin SRS-te mal a sawm a, ṭhalai tam tak tichhe thei tur ruihhlo an man a, ram leh hnam dinchhuah theih nan YMA chuan ṭan a la zel dawn a ni," a ti.

Lalbiakzuala chuan, khaw­chhak lam aṭangin Mizoramah methamphetamine ṭhahnem tak a rawn lut mek tih sawiin, "Hei hi damdawi kheh ṭhinte thil tih a ni a, a pawizia a lang ṭan a ni," a ti a; damdawi kheh avanga inti mi liante endawng ngam turin Mizoram mipuite a chah.

SRS secretary RL Zomawia report-a a lan danin, April 11, 2015 zingah SRS-in ruihhlo do beihpui an thlak ṭan. April 11 aṭanga tun thlengin heroin gram 740, alprozelum mûm 3,860, ganja kg. 4.200, methamphetamine mûm 1,08,800 an man a; ruihhlo man hlut zawng chu tualchhunga an hralhna ang chuan Rs. 3,58,95,000 hû a ni.

Ruihhlo man kaihhnawih­ah mi 476 an khawm tawh a, chung zinga 31 chu magistrate hriatpuiin home-ah an dah a, Police leh Excise & Narcotics kutah mi 14 ve ve an pe. A bak zawngte chu zilhin, an awmna veng hruaitute hnenah an pe thung.

Inrinni zinga SRS-te ruihhlo hâl takte chu heroin gram 210.5, ganja kg. 2 leh fûn 95 leh, SRS din hmaa CADS-te man al­pro­zelum mûm 8,210-te a ni a; tualchhung rate-ah Rs. 19,16,900 hû a ni. An hâl ral tak bak ruihhlo an mante chu Police leh Excise & Narcotics hnenah an hlan.

SRS hi hun eng emawchen tih­tawp a nih hnuah, April 6 khan Central YMA hnuaia central exe­cutive committee (CEC) chuan SRS din thar leh rawtna pawmin din a ni.