Bru lâk lêt tur awm lo

Hamsapara camp-a Bru awm, Mizorama kîr duh nia insawia inen­fiah­tirte chu an inhnuk­dawk leh a, he mi hnu hian lâk kîr tur an awm loa ngaih a nih thu Chief secretary Lalmalsawma chuan a sawi.

Zawhna chhanga Chief Secretary sawi dan­in, Hamsapara camp-a enfiahna report hi Mamit Bawrhsap hnen aṭangin an nghak mek a; inenfiahtir an awm loh avangin Hamsapara camp-a mite lak luh hun tura ruat, July 6-10, 2015 chhungin lak let tur an awm loa ngaih a ni.

Home department secretary ni bawk Lalmalsawma chuan, Tripura-a Bru relief camp paruka Mizoram Bru-te lak letna tura road map siam chu sorkar laipui leh Supreme Court pawmpui a nih avangin ruahman lâwk anga kalpui zel a nih dawn thu a sawi a, "La enfiah loh camp pathum dangte pawh Mizorama kîr duhte enfiah zuia lak kîr tur awmte lak kîr an ni ang," a ti.

Kum 2014-a Bru hruai kîr thawh rukna neih aṭanga July 3, 2015 thleng khan mahni duh thua Mizorama let (self repartiation) Bru chhungkua 1,582 an awm tawh a, chung­te chu Mamit Bawrh­sap pisaah an inhriattir a ni a, chhawmdawlna erawh pek an la ni lo.

Chhungkua 1,582-te bakah hian, a hmain mahni duh thua Mizorama kîr Bru chhungkua 249 an awm a, chung mite hnenah chuan ṭanpuina - cash assistance Rs. 41,500, housing assistance Rs. 38,500, transportation assistance Rs. 5,500 leh temporary shelter-ah Rs. 2,000 pek an ni a, a vaiin Rs. 87,500 a ni. Free ration buhfai ni tin puitling pakhat tan gram 600 leh naupang pakhat tan gram 300 pek mek an ni bawk a, kum khat chhung pek an ni ang.