Kanhmun kaltlangin Rs. 1,56,480 hmu

Mizorama thlai thar chhuah, Kanhmun leh Damcherra Bazar (Tripura) kaltlanga hralh chhuah ṭhin aṭangin Kanhmuna Trade & Commerce department chuan kum 2014-15 chhung khan Mizoram sorkar sum báwmah Rs. 1,56,480 an chhûng lut.

Thu dawn danin, Tripura-a Damcherra khuaah chawlhkar tin Thawhlehni apiangin bazar ní neih ṭhin a ni a, Damcherra bazar ní-ah hian Mizoram khawthlang tlangdung leh Mizoram hmun hrang hrang aṭangin loneitute'n thlai thar leh ran vulhte an zuar ṭhin.

Mizoram aṭanga thlai leh sa an thawn chhuahte chu kuhva, serthlum, hatkora, sawhthing, chhawhchhi, hmacha leh sanghate a ni tlangpui. Hatkora an thawn chhuak tam ber a, kum 2014-15 chhung khan hatkora quintal 6,831 thawnchhuah a ni.

Tripura depa khua, Kanhmunah Trade & Commerce department-in office an nei a, Mizoram aṭanga thil thawn chhuah leh Tripura aṭanga lak luh thil ṭhenkhatah revenue an la a, heta ṭangin kum 2014-15 chhung khan sorkar sum báwmah Rs. 1,56,480 an chhung lut a ni.

Trade & Commerce hotute chuan, Tripura aṭanga Kanhmun lama ran lak luh langsar zualte chu - bawng, vawk leh ar a nih thu an sawi.