Hindi zirtirtu 665 lâk zingah Hindi-a biak hleih theih loh tam tak an awm - MCHTA

Mizoram CSS Hindi Teachers Association (MCHTA) chuan thuchhuah siamin, tun hnaia Centrally sponsored scheme (CSS) hnuaia Hindi zirtirtu atana mi 665 lak zingah Hindi-a biak hleih theih loh tam tak an awm niin an tarlang.

MCHTA hi CSS hnuaia Mizoram sorkara Hindi zirtirtu, contract-a kum 6 vel thawk, February 28, 2017-a chawlhtirte an ni. Central guidelines ang chuan, CSS Hindi teacher-te chu state sorkarin a enkawl chhunzawm tura tih ni mah se, Mizoram sorkarin a enkawl zui theih loh avangin ban an ni a; an thawh chhunzawm theih nan pawl angin hma an la a, Delhi-ah Union Minister-te pawh an hmu tawh ṭhin a ni.

MCHTA tarlan danin, páwl anga nasa taka hma an lak hnuah CSS hnuaia Hindi zirtirtu 665 lakna tur a chhuak a, Mizoram sorkarin advertisement chhuahin Hindi zirtirtu lakna chu an kalpui a, tunah chuan lâk tawh a ni.

CSS Hindi zirtirtu 665 lâk turah a hmaa kum 6 chhung thawk tawh mi 1,305-te chu ngai pawimawh turin Mizoram sorkar an ngen ṭhin tih sawiin MCHTA chuan, "Trained kher a ngaih tawh avangin mahni pianpui ṭawng ang maia Hindi thiam mi tam tak chu untrained kan nih avangin kan dil ve thei ta lo a ni," an ti a; indaih lo tak chungin trained-te lak an nih thu an tarlang.

MCHTA chuan, kum 6 an thawh chhungin training phalsak an nih loh avangin, CSS Hindi teacher ṭhin mi 1,305-te chu Hindi teacher 665 lâk turah ngaihhnathiamna pe turin sorkar an dil ṭhin tih an sawi a, "Mahse, awmzia a nei thei lo. Tuna Hindi teacher post 665 hi MCHTA-in a thm a vár thlu loa kan nawr chhuah liau liau a ni a, keimahni mi 1,305 aṭangin an hnawhkhat dawn emaw tia beiseina nen kan nghah laiin, kan thawh chhunga training chhuakte lak an ni. An zingah Hindi ṭawnga biak pawha chháng hlei thei lo tam tak an awm," an ti.

School Education minister Lalchhandama Ralte-in December 18, 2020-a Hindi lama padma shree dawng leh doctorate degree neite chawimawinaa thu a sawiah, CSS hnuaia Hindi zirtirtu 665 lakah diltute'n an daih loh zawk thu a sawi chu hriatthiam harsa an tih thu an sawi a; "Hindi teacher kum 6 chhung thawk tawhte hi thiamna leh qualification sang tak tak nei vek an ni," an ti. Mi 1,305-te chu an beiseina inthlan dawna campaign auhla atana hmangtute'n an thàmraltir ta tih an sawi bawk.