Samagra Shiksha-te hlawh tur tifel

Mizoram sorkar chuan thuchhuah siamin, Samagra Shiksha hnuaia thawkte hlawh August 2020 aṭanga pek theih loh chu pe tura tihfel a nih thu a tarlang a, "Krismas hma ngeia pek tum a ni," a ti.

Sorkar thuchhuah tarlan danin, Samagra Shiksha hnuaia thawkte'n Krismas hma ngeia hlawh an lâk theih nan School Education minister Lalchhandama Ralte-in theihtawp chhuahin a buaipui a, Mizoram sorkarin state matching share (SMS) a pek turte chu pek kim a ni.

State matching share pek hnuah pawh hun rei tak sorkar laipuiin hlawh tur a rawn pe mai thei lo niin an tarlang a; December 18, 2020 khan sanction order a rawn thleng a, ṭul leh pawimawh buaipui nghal niin, December 21, Thawhṭanni khan RBI-in Mizoram account-ah sum a thun ta niin an tarlang bawk.

Sorkar tarlan danin, nimin khan Finance department-ah expenditure sanction tihfel a ni a, sum lak chhuah (draw) phalna pawh hmuh tawh a ni. Nimin vêk khan district project office-ah chhùng luh a ni a, primary school aṭanga higher secondary school zirtirtute account-ah August aṭanga December (thla 5) hlawh chu Krismas hma ngeia pek a ni ang.