Upate hi ram leh hnam ro hlu an ni - Minister PC Vanlalruata

Minister PC Vanlalruata chuan nimin khan a bial chhunga Chhingchhip Mualpui Chhingpuii Rûnah Mizoram Upa Pawl, Chhingchhip area conference a hmanpui a; upate chu ram leh hnam ro hlu an nih thu a sawi.

PC Vanlaruata chuan, upate chu ram changkang apiangin an chawimawiin an ngaisang ṭhin tih sawiin, Mizoramah pawh upate chawimawi leh zah kawngah ṭan lak a ngaih thu a sawi a, "Upate hi hnam ro hlu an ni a, an thiamna leh finnate hi ṭhangtharte hian kan mamawh," a ti a; an tawnhriatte ram tana hmang ṭangkai turin upate a ngen.

Agriculture Minister chuan, kalphung thar mipui sorkarin kum upate ngai pawimawhin, tar pension-te pawh a tisang chho tih a sawi a, "Hriselna lamah pawh hamṭhatna an neih theih nana sorkar chuan ngaihtuahna a séng mek a ni," a ti.

MUP, Chhingchhip area-ah hian branch pasarih an awm mek a; an inkhawmpuiah hian lengkhawm zai intihsiak an buatsaih a ni.