KHAWTHLIR

Road Safety Awareness

Toyota Kirloskar Motor, ADRA leh Aizawl Traffic Police chuan tunlai hian sumdawnna lirthei khalhtute tan Vaivakawn Cultural Centre cum Auditorium-ah Road Safety Awareness & Health Camp an buatsaih mek. Camp hi February 17 khan Traffic SP Stephen Lalrinawma'n a hawng a, February 21, 2025 thleng buatsaih a ni ang.

MLA-in hmanpui

Dampa bialtu MLA Lalrintluanga Sailo chuan nimin khan a bial chhunga West Phaileng Dinthar community hall-ah MUP, West Phaileng area conference a hmanpui. MLA chuan, ram rorelnaah upa zawk leh tawnhriat ngah zawkte an mamawh ṭhin thu a sawi. MUP, West Phaileng area-ah hian MUP branch pasarih awmin, member 882 an awm mek a ni.

Free eye camp

South Tuipui bialtu MLA Jeje Lalpekhlua bultumin Hnahthial District Hospital-ah hun eng emaw ti chhung a thlawna mit entirna, free eye camp buatsaih a ni a, nimin khan zawh thawkhat niin, mit zai sakte vawiinah enfiah leh a ni ang. Eye camp-ah hian mi 250 an inentir a, an zinga 41 chu an mit zai a ni.