Mizoram leh Arunachal Pradesh state din champha lawm a ni

Nimin February 20 kha Mizoram leh Arunachal Pradesh te state dinhmuna hlan kai champha a ni a; state pahnih din champha hi 'Ek Bharat Shreshtha Bharat' hmalakna hnuaiah Raj Bhavan Durbar Hall-ah Governor Gen. Vijay Kumar Singh hoin lawm a ni.

Mizoram leh Arunachal Pradesh hi February 20, 1987 khan state dinhmunah hlan kai a ni a; state foundation day-ah hian Regional Institute of Paramedical and Nursing Sciences (RIPANS) zirlaite'n Mizo leh Arunachal hnam lâm an entir.

Gen. VK Singh chuan, kal khawmte chu state foundation day chibai bûkin duhsakna a hlan a; state pahnihte chu ram nuam leh mawi, tribal hnam hrang hrang leh tih dan hrang hrang neite inrem taka khawsakhona a nih thu sawiin, "Hnam bil sawi loa state anga hmasawn tlànna tur ngaih pawimawh a ṭul," a ti a, hnam ziaráng leh tih dante vawng him zel turin kal khawmte a chah.

'Ek Bharat Shreshtha Bharat' chuan India rama hnam hrang hrang, ṭawng, ei leh bar, incheina leh nunphung hrang hrangte inkara inpumkhatna siam a tum tih sawiin Larsap chuan, "Kan danglamna hi min ṭhendarhtu tur ni loin, min phuar khawmtu tur zawk a ni a, hei hian ram anga hmasawnna kawng kan zawhnaah hma lam min panpui a ni," a ti.

Governor chuan, India chu khawvel ram dangte awh rawn leh beiseina kawnga entawn berte zinga mi a nih thu sawiin, "Kan zavaia thawhhona vang a ni a, India ram hmasawnna hi kan kutah a innghat tlat a ni," a ti a; India ramin kum 2047-ah ram changkang leh intodelh, 'Vikshit Bharat' nih a tumnaah theihtawp chhuah turin mipui a chah.

State pahnih state day lawmna hi additional PS to Governor Lalhruaitluangi'n a kaihruai a, Mizoram Christian College principal Dr Tawnenga'n Mizoram chanchin sawiin, Mizoram University (MZU)-a thawk Camdir Tabia Tegi-in Arunachal Pradesh chanchin a sawi.

Northeast Areas (Reorganisation) Act, 1971 hnuaiah kum 1972 khan Mizoram chu union territory a ni a, India Danpui siamṭhat vawi 53-na, 1986 hnuah February 20, 1987 khan India ram state 23-na a ni. North-East Frontier Agency (NEFA) tih ṭhin Arunachal Pradesh pawh kum 1972 khan UT a ni a, February 20, 1987 khan India rama state 24-na ni turin hlan kai a ni.

Ek Bharat Shreshtha Bharat hnuaiah hian India rama state leh UT tina cheng hnam hrang hrang inkarah inpawhna ṭha zawk siam siam tum a ni a, khawi state/UT emaw din champha a thlenin state hrang hrangah hun hman ṭhin a ni. State/UT foundation day lawmna hi Mizoramah chuan Governor kaihhruaiin Raj Bhavan-ah June 2023 khan buatsaih ṭan a ni.