National Mathematics Day hman a ni

Directorate of Science & Technology hnuaia Mizoram Science, Technology & Innovation Council (MISTIC) leh Mizoram Mathematics Society (MMS) buatsaihin nimin khan Aijal Club-ah National Mathematics Day hman a ni a, deputy chief minister Tawnluia'n a hmanpui.

Tawnluia chuan, National Mathematics Day lawmna leh a kaihhnawih programme hrang hrang hripui léng mila online-a hmanga buatsaih a ni ṭha a tih thu sawiin, "Khawvel hmasawnna kawng hrang hrang - agriculture, ram venhimna, hriselna lam kawnga hmasawnna, inbiakpawhna leh zirna thlengin science leh mathe­matics-ah a innghat a ni," a ti a; Mizoramah pawh mathematics uar thar a ṭul thu a sawi.

National Mathematics Days lawmnaah hian Human Resources Development Board vice chairman L Thangmawia, MLA leh Planning secretary Dr C Vanlalramsanga te pawhin thu an sawi.

National Mathematics Day hi India sorkarin February 26, 2012 khan a puang a, mathematics lama India mihráng Srinivasa Ramanujan pian champhaah hman a ni. Kum 2012-ah hman ṭan a ni a, kum 2012 kha National Mathematics Year-a puan a ni. Mathematics Day-ah hian mathematics pawimawhna leh ni tin nuna a ṭangkainate mipui zirtir ṭhin a ni bawk.