KHAWTHLIR

Sorkarin college din belh a tum lo

Higher & Technical Education minister Dr Vanlalthlana chuan nimin khan Assembly session-ah opposition leader Lalchhandama Ralte zawhna chhangin, Mizoram sorkarin college din belh emaw, a awm sa sâwi khawm (amalgamate) emaw tumna a neih loh thu a tarlang.

Kuhva rah man

Assam Rifles sipaite chuan February 20, Ningani khan Ngur, Champhai district-a ramhnuaiah Myanmar aṭanga lak luh kuhva rah ip 28 an hmu chhuak a, Champhaia Customs Preventive Force hnenah an hlan.

Nuai 20 seng

Tourism minister Lalrinpuii chuan BJP member Dr K Beichhua zawhna chhangin, Leitlangpui Music Festival 2024 atan sorkar sum cheng nuai 20 sen a nih thu Assembly House a hrilh.

PACS exposure visit

Mizoram Cooperative Apex Bank chuan NABARD kaltlangin February 18-21, 2025 chhung khan Primary Agriculture Credit Society (PACS) ding tharte tan exposure visit a buatsaih. Mizoram hmun hrang hranga PACS ding thar 13 aṭangin mi 22 an tel a, Vaphai PACS leh Champhai Large Area Multipurpose Society-te an tlawh a ni.

BCM Assembly

Lunglei Municipal Council vice chairman K Lalrinawma chuan nimin khan a pisaah BCM Assembly Central Committee member-te a kâwm a; March 5-9, 2025 chhunga BCM Chanmari Kohhrana BCM Assembly neih tur chungchang an sawiho. Inkawmnaah hian BCM Assembly chhunga bawlhhlawh sâwngbàwl dan tur, LMC aṭang bawlhhlawh báwm leh a paihna tur lirthei ngaihtuah dan turte sawiho a ni a, thil pawimawh dangte sawi a ni bawk.

Training of trainers

Lunglei district Nasha Mukt Bharat Abhiyaan hmalaknain nimin khan Lungleia School Education conference hall-ah zirtirtute pualin ruihhlo hman sual venna tur inzirtirna, 'Training of Trainers Programme on Drug Abuse Prevention for Master Volunteers and Nodal Teachers' buatsaih a ni. Mizoram Social Defence and Rehabilitation Board aṭangin resource person pahnih Vanlalhruaii leh Lalrindika ten thil pawimawh an zirtir.

Standardised test

Khawzawl bawrhsap K Vanlalṭhiana hoin nimin khan DC meeting hall-ah Foundational Literacy and Numeracy (ziak leh chhiar) naupangin an thiam zawk nana standardised test hman chungchang sawiho a ni. Naupang ziak leh chhiar thiam chin tehna leh an tlakchhamte chhinchhiah theihna SCOPE App chu April 7, 2025 hmaa peih hman tum a nih thu tarlan a ni a, app enchhinna tur sikul panga an thlang.

VC thlan sawiho

Chakma Autonomous District Council huam chhunga village council inthlanpui neih tura inbuatsaihna kal zelah nimin khan Lawngtlai district election officer Cheemala Siva Gopal Reddy hoin a pisaah nodal officer-te leh political party aiawhte an ṭhukhawm a; inthlanna hlawhtling leh thianghlim nei tura thawhho zel an tum thu an tarlang.

Mizo Upa Pawl

Mizo Upa Pawl Sub-Headquarters, Hnahthial chuan nimin khan Hnahthiala Horeb Lodge conference hall-ah General Conference vawi 3-na an hmang a, additional DC Zothanmawia Khiangte-in a hmanpui. Hnahthial Sub-Hqs MUP-ah hian unit 28 leh member 2,760 vel an awm mek a ni.

Mobilisation camp

Champhai District Fisheries Development Office leh CSC, Champhai chuan nimin khan IPR conference hall-ah Pradhan Mantri Matsya Samridhi Sah Yojana (PM-MKSSY) hnuaiah Mobilization Camp an buatsaih a, sangha khawitu mi 69 an tel.

Chaltlang Tourist Lodge mi dang hnenah hlan tum

Tourism minister Lalrinpuii chuan nimin Assembly session-ah BJP member Dr K Beichhua zawhna chhangin, Chaltlang Tourist Lodge chu mi dang hnena hlan tum a nih thu a tarlang. Minister Lalrinpuii tarlan danin, Mizoramah 5 star hotel a la awm lo a, ram hmasawn nan leh Mizoram state-in thlen in changtlung zawk a lo neih ve theihna atan leh 5 star hotel siam a nih theih nan Chaltlang Tourist Lodge chu mi dang hnenah hlan tum a ni.