Lunglei-Tlabung kawng siam mekah hna thawh tur 50% zawh a ni tawh

Lunglei leh Tlabung inkar National Highway-302 kawngpui laih zauh hna thawh chu nimin khan Lunglei DC hnuaia din inspection team-te'n additional DC Rochuangkimi Khenglawt, CALA hoin an endik. Kawng hi package A leh B-ah siam tur aṭanga a zatve (50%) ve ve zawh a ni tawh.

Inspection team-ah hian Additional DC bakah Tlabung SDO (Civil) leh Lungsen BDO, IPR, PWD leh DC office LA Branch official te, YMA Lunglei Sub-Headquarters hruaitute leh NH-302 Ngaihven Pawl aiawhte an tel. NH enkawltu National Highways & Infrastructure Development Corporation Limited (NHIDCL) hotute leh kawng siamtu contractor BRN Infrastructures Private Limited hotute'n an lo dawngsawng a ni.

Kawng endiktute chuan kawngpui blacktop tawh chin chu ṭha thawkhatah an ngai a; hna muang deuh lai nia an hriat leh ngaih pawimawh hmasak ngai laite chu fûr a thleng hmaa a theih anga chaka thawk turin hna thawktute an chah.

Fûr laia mipui châkkhai leh mamawh phurhna leh khualzin veivahna kawngah harsatna a awm loh nan Phairuangkai lei leh Tuichawng leite thawm ṭhat dan tur sawiho nghal a ni bawk.

NH-302 kawngpui zauh hna thawh mek hi Hrangchalkawn-Tlabung a ni a, kawng hluiah chuan km. 96-a thui a nih laiin, kawng tharah chuan km. 75.070-a thui tur a ni.

Kawngpui zauh leh siamnaah hian hlawm (package) hnihah ṭhen a ni a; Package A chu Hrangchalkawn-Chhumkhum (km. 37.420) niin, hna thawh tur aṭanga 50% zawh tawh a ni. Package B chu Chhumkhum-Tlabung (km. 37.650) a ni a, hna 50% zawh a ni tawh.

NH-302 kawng siam bakah, lui kânna tur lei dawh tur pali a awm a, lei lian pathum leh lei tê pakhat niin, hna thawh ṭan mek a ni.