National Tribal Livelihoods Submit-ah minister Lalrinpuii khualzahawm a ni

Bharat Rural Livelihoods Foundation leh Axis Bank Foundation chuan nimin khan Dr Ambedkar International Centre, New Delhi-ah 'National Tribal Livelihoods Submit, 2025' an buatsaih a, Social Welfare & Tribal Affairs and Women & Child Development minister Lalrinpuii khualzahawm a ni.

Minister Lalrinpuii chuan, Mizoram chu BRLF hmalak lohna state a ni chunga khualzahawm ni tura an sawm chu a lawm thu sawiin, Mizoramah mipui eizawnna kawnga hmalakna Bána Kaih (Handholding) policy tihchakna turin thawhpui a châk thu a sawi.

Lalrinpuii chuan, Mizoram chu state kilkhawra awm ni mah se, theihna tam tak a neih thu sawiin, "Ruahmanna ṭha a awm chuan Mizorama kut hnathawka eizawngte chu taima leh rinawm tak an ni a, khaw kar kawngah pawh hun rei tawh tak aṭang khan nghah loh dawr eng emaw zat a awm a ni," a ti.

Mizoram awmna kilkhawr avang leh mihring an la tam tawk loh avangin corporate social responsibility (CSR) sum leh funding agency lian a la luh tam loh thu sawiin Lalrinpuii chuan, state dangte ruala Mizote'n hmasawnna an neih ve theih nan Mizoramah hma la turin kal khawmte a sâwm.

National Tribal Livelihood Summit-ah hian funding agency lian te, sorkar laipuia official-te leh state hrang hrang aiawhte an tel a ni.