Sum harsatna zualpui kum li chhungin Chinfel ngei kan tum: Finance Minister

Finance minister Lalsawta chuan, Mizoram sum leh pai dinhmun harsatna zualpui chu kum li chhunga chinfel ngei an tum thu a sawi.

Mizoram Audit & Accounts Service Association (MAASA)-in nimina Aijal Club-a general conference an neih a hmanpuinaah thu sawiin Lalsawta chuan, "Tunah hian Mizoram sorkarin sum harsatna a tâwk mek. Kum tam tak chhung lo inchhêkkhâwl tawh a nih avangin harsatna hi sutkian thuai theih a ni lo," a ti a, heti chung hian sum harsatna chu thui tak chinfel a nih tawh thu a sawi.

Finance Minister chuan, sum leh pai dinhmun siam ṭha tur chuan kalkawng a chho dawn hle tih sawiin, "Inthlahdah a theih dawn loh. Kei leh Finance department pawhin mi ngainat kan hlawh lo ang. Mahse, kan sum leh pai dinhmun enin pawi kan ti lo. Ram tana ṭha tur leh danin a phal ang zelin kal kan tum," a ti.

Lalsawta sawi danin, tlawmngai pawl, sorkar leh kohhrante'n an sum leh paite chartered account an audit tir ṭhin a; nimahsela a audit tirtute duh danin an ti lo fo. A chhan zawh an nih chuan, an duh dan anga audit tur chuan sum leh pai tam zawk an lo beisei ṭhin a ni.

Accountancy thiamte an ṭangkai thei hle tih sawiin Lalsawta chuan, "Accountancy thiamte tan hian India ram pawna awm a awlsam bakah, hna thawh tur hmuh awl a ni," a ti a; accountancy lam chu Mizo zirlaite'n ngaihven se a duh thu a sawi.

MAASA conference hi an pawl president C Vanlalsiama'n a kaihruai a, resolution pathum an pass. An resolution pass-te chu - MF&AS Service rules siamṭhat tum mekah tun hmaa method of recruitment awm tawh dan tihdanglam an duh lohna thu te, assistant auditor post ruak 36 a rang thei ang berin hnawhkhah an phût thu te, leh an office building chu AMC-in a him lo an tih vanga building dang ngaihtuah sak vat tura sorkar an phût thute a ni.

Tun dinhmunah MAASA-ah hian member 84 an awm a ni.