KHAWTHLIR

Thisen pe
Lawngtlai College Veng unit ṬKP chuan ṬKP Day lawm nan nimin khan Lawngtlai District Hospital tan thisen unit 12 an pe a, a petute mipa 10 leh hmeichhia pahnih an ni.

NIB leh DDK
NLUP Implementing Board (NIB) leh Doordarshan Kendra (DDK) chuan, nimin khan thawh dunna tur memorandum of understanding (MoU) an ziak. MoU ang chuan, NLUP hnuaia hmalaknate chawlhkar tin vawi khat DDK-ah chhuah ṭhin a ni ang.

Mat lei siam dawn
PWD chuan thuchhuah siamin, Serchhip leh Thenzawl inkara Mat lei chu vawiin chawhma dar 10 aṭanga tlai dar 4 thleng thawm ṭhat hna thawh a nih dawn tih an tarlang a, hna thawh chhungin kal tlang theih a nih dawn loh avangin mipuite hriat­thiamna an ngen.

Lawmthu sawi
Zo Re-unification Organaisation (ZORO) chuan thuchhuah siamin, an president R Thangmawia, Geneva, Switzerland-a a thihna te, Mizorama a ruang thawnna leh a vuina thlenga thâ, sum leh pái sengtu zawng zawngte chungah leh, amah súntute zawng zawng chung­ah lawmthu an sawi.

Mamitah training
Nimin khan Mamit district chhunga police station hrang hranga police-te tan 'Police Public Relation' tih thupui hmangin training buatsaih a ni a; Mamit SDPO Lalṭanpuia leh IPRO JH Lalparmawii ten police-te leh IPR department leh media ten thawhhona ṭha zawk an neih theih dan tur an sawi.

Thing phun
Central YMA leh PHE dept. thawh dunna bawhzuiin Nilaini khan Chalfilh Group YMA, VC-te leh Rural WATSAN Division ṭangkawp chuan Chalfilh tlang leh a chhehvelah tui hna humhalh nan thing­phun beihpui an thlak a, Chalfilh bialtu MLA Dr. Ngurdingliana'n a ṭawimawm.