NIT zirlaite'n Raj Bhavan bulah harsatna puang

National Institute of Technology (NIT), Mizorama zirlaite chuan nimin khan an zirna kawnga an mamawh chi hrang hrangte Governor Lt.Gen. Nirbhay Sharma sawipui an tum a, zirlai eng emaw zat Raj Bhavan bulah an pungkhawm.

Thu dawn danin, Governor chuan NIT zirlaite harsatna chu zir chian hmasak phawt a duh a, Governor Secretary leh NIT Director ten zirlaite dinhmun an zir chian hnuah zirlaite chu an thil phût chungchang hi sawipui a duh a ni. Governor chuan an harsatna tawhte hriattir tura a tih angin, NIT zirlaite chuan vawiin hian report an thehlut ang.

NIT zirlaite chuan faculty an neih ṭhat tâwk loh thu te; library, internet, class room leh laboratory changtlung zawk an mamawh thu te; campus an neih mumal loh vanga harsatna an tawh thute leh hostel chhunga tui, security, medical leh thil dang pawimawhte a awm ṭhat tâwk loh thute an sawi.

Zirlaite chuan, tun thlengin zirna hmunhma leh an zirna kawngah ruahmanna mumal zawk a awm thei lo tih an sawi a; hei vang hian changtlung zawka zirna kalpui a nih theihna atan state danga NIT nen inchhûnfin emaw, ruahmanna dang emaw siam hial an duh thu an sawi bawk. Zirlaite sawi danin, NIT Mizoramah hian branch panga - Civil, Mechanical, Electronic & Communication, Computer Science & Engineering leh Electrical Engineering a zir theih. Civil leh Mechanical Department-in laboratory an nei loh bakah zirtirtu mumal pawh an nei lo.

NIT-Mizoramah hian zirlai 300 an awm mek a, chu'ng zinga 250 chu state danga mi an ni.