Thanliana'n NLUP dawngtute a fuih

Horticulture minister PC Lalthan­liana chuan, NLUP dawngtu thawk ṭha lote chu ngaihsak an hlawh zui lo a nih pawhin vui thei an nih loh thu a sawi.

Horticulture Minister hian nimina Hausiamapa Hall, Haulawnga NLUP ṭanpuina a semnaah thu sawiin, "Hor­ticulture hnuaia ṭanpuina dawngte chu an hnathawh dan enfiah zel a ni ang a, thawk ṭha lote chu ngaihsak zui an hlawh lo a nih pawhin vui thei an ni lo ang," a ti.

State páwn aṭanga thlai leh thei lak luh ngai tawh lo tur khawpa hna thawh a ṭul tih sawiin, PC Lalthanliana chuan, "Sorkar chuan kuthnathawktute tan theihtawp a chhuah zel ang a, hlawhtlinna erawh an kutah a awm a ni," a ti a; NLUP hnuaia ṭanpuina dawng­tute chu tihtakzeta hna thawk turin a fuih.

Nimina NLUP ṭanpuina dawngtute hi khaw 13 - Haulawng, Mualṭhuam ‘N’, Sekhum, Ramlaitui, Kanghmun, Mau­sen, Hmuntlang, Zotuitlang, Cheng­pui, Phaileng ‘S’, Bualpui ‘V’, Chhip­phir leh Zote ‘S’ khuaa mite an ni.