Medical college din theih dan tur enfiah

Health minister Lal Thanzara chuan nimin khan State Referral Hospital, Falkawn a tlawh a, parliamentary secretary (Finance) KS Thanga’n a ṭawiawm. Medical college din theihna tura mamawhte an enfiah.

Health Minister hian State referral Hospital hmunhmáte chipchiar taka fangin, thawm ṭhat a ngaihna lai te, thawktu dah belh ngai leh khum mamawh belh a nih dante a en. Medical college dinna tura ruahman a nih angin, Medical Council of India-in tih tura a tuk an phâk lohna laite enin, ṭan lak dan tur an thlirho.

Sorkar thuchhuah tarlan danin, State Referral Hospital-ah hian khum 150 a awm mek a, medical college dinna turin khum 300 tal a ngaih avangin khum 150 dang dah belh a la ngai. Building zauh te, pindan chei ṭhat te, hmanrua lak khawmte leh thawktu eng emaw zat lak belh a la ngai dawn bawk.

Medical Council of India duh dan anga damdawi-in chei ṭhat a nih theih nan sorkar laipui aṭangin cheng nuai 17,010 hmuh beisei a ni a, chutah chuan Mizoram sorkar tum tur (matching share) chu nuai 1,890 a ni. Sum hmuh tur thawh khatna nuai 5,000 chu hmuh thuai beisei a ni.

State Referral Hospital-ah hian H1N1 vei an awm palha enkawl theihna tur ICU peih thawkhat a ni tawh a, naupang ward (Paediatrics) atan khum 18 dah thar niin, vawiinah hman ṭan nghal a ni ang.

Health Minister-in State Referral Hospital a tlawhnaah hian Health secretary Lalhmingthanga, Health principal director Dr K Ropari, Health Services director Dr Rohmingthanga Ralte leh Hospital & Medical Education director Dr Lalbiakkima te pawh an kal a ni.