Serchhip Tuikhuah Venga lei khì enfiah

Tunlaia ruahsur nasa avangin Serchhip Tuikhuah Vengah lei khì leh tlahniam a awm a, chungte chu nimin khan Serchhip additional DC VL Remliana leh thuneitu dangte'n an enfiah.

Sorkar thuchhuah tarlan danin, Serchhip Tuikhuah Veng tantlangtu NH-54 chu meter 40 vela thui a tlahniam tawh a, zau takin lei a chêt bakah, hmun hrang hrangah lei khi a awm a ni.

Lei khi endiktu mi­thiam­te sawi danin, lei che zel tur dan chu a hautak hle dawn a, sum sên a tam tham dawn avangin hun eng emaw chen nghah a ngai turah an ngai. Tun maia hmalak theih awm­chhuna an hriat chu - kawngpui chung lam aṭanga tuihâwk lut tam lutuk tur vên leh lei chêt nasat zualna bul vela tuihâwk luankawr ṭha zawk siam a ni.

Serchip Village Coun­cil-III vice president C Lalhminghlua chuan, Tuikhuah Venga lei khîkna hmun chu kum 10 dan velah a che ziah ṭhin­a an hriat thu a sawi.

C Lalhminghlua sawi danin, tuna lei chetna hmun hi kum 1988 khan nasa takin a che tawh a, a chheh­vela chengte pawhin an chhuahsan vek a, NH-54 pawh a khawih chêt avang­in kawng thar sial a ngaih phah hial a ni. Kum 2007-ah a che nasa leh deuh a, a thlang lamah BRTF-te'n check-dam an lo siam tawh a ni.