Mizoram Shops and Establishment Act, 2010 Hmantir lo turin sumdawngte'n sorkar an ngen

Mizorama sumdawng inzawm khawm pawl, Mizoram Bussiness Coordination Committee (MBCC) chu nimin khan an ṭhukhawm a; Mizoram Shops and Establishment Act, 2010 chu hman luihtir lo turin Mizoram sorkar an ngen.

MBCC convener F Rodingliana chuan, MBCC chu Mizorama sumdawng páwl hrang hrang 42-in sumdawngte hmasawnna tur leh harsatna inphuhrûk tawnna tura an din a nih thu sawiin, "Tunah hian sumdawng pawl hrang hrang 47 an tel tawh a, mi dangte pawh lo tel zel tur in kan insáwm a ni," a ti.

F Rodingliana chuan, inkhàrkhip vanga sumdawngte harsatna hrang hrang sutkian nan sorkar nen vawi tam tak an indàwr tawh tih sawiin, "Kan harsatna kan thlente min ngaih pawimawhsak ṭhin a, lawmthu kan sawi a ni," a ti a; Covid-19 chungchangah inkhuahkhirhna dan emaw, rorelna dang a awm leh dawn chuan, a tuar nasa ber zinga mi an nih avangin sumdawng páwl an tel ve tawh an inbeisei thu a sawi.

MBCC hruaitute chuan, Mizoram Shops and Establishment Act, 2010 chu hman luihtir lo tura sorkar ngenin, "He dan sakei chungchangah hian Zorama sumdawng pawlte'n kan zawh loh ngháwngkawl kan bah lo nan Mizoram sumdawng zawng zawngte ṭang rual a, MBCC hmalaknate min ṭawiawma min thláwp tlat turin kan ngen a ni," an ti.

Ṭhutkhawmah hian kumthar atana convener tur MIZOFED chairman Laldawngliana hnenah F Rodingliana'n mawhphurhna a hlan nghal a ni.