NH-302 Tlabung-Lunglei inkar Ṭha zawka siam turin an ngen

Tlabung leh Lunglei inkalpawhna kawngpui, National Highway 302-in a paltlang hmun ṭhenkhat chu ṭha zawka siam turin bialtu MLA Nihar Kanti Chakma leh Joint Action Committee-te'n NH enkawltu National Highways and Infrastructure Development Corporation (NHIDCL) hotute hnenah an thlen.

Tlabung aṭanga thu dawn danin, NH-302 hi tunlai hian a chhe zual lai thawm ṭhat mek a ni a, kawng khuar zualte hnawh mâm a ni. Tlabung leh Sihphir tlang inkar kawng thawm ṭhat a nih dan chu West Tuipui bialtu MLA NK Chakma leh Tlabung Joint Action Committee-te chuan duhkhawp loin, NHIDCL hotute hnenah ṭha zawka siam turin a hran ve vein an ngen a ni.

NHIDCL hnena ngenna an thlenah hian, Tlabung leh Sihphirtlang chu kum dangah pawh lirthei tan zawh a hrehawm zual ṭhin tih an tarlang. Fûrpuiin a nangching a nih chuan harsatna nasa zawk thleng thei a nih avangin a rang lama tun aia ṭha zawka thawm ṭha turin NHIDCL an phût a ni.

MLA NK Chakma chuan NHIDCL hotute phone hmanga a biaknaah, NH-302 chu Tlabung leh a chhehvel khaw hrang hrangte châk lâkna kawng pawimawh a ni tih sawiin, ṭha zawka siam turin a chah.