Governor hmalaknaah BJP an lawm

BJP, Mizoram Pradesh chuan thuchhuah siamin, Governor PS Shreedharan Pillai-a'n All India Institute of Medical Sciences (AIIMS) tlukpui Mizoramah din tura Prime Minister a ngen chu lawmawm an tih thu an tarlang.

Mizoram BJP chuan, tun hnaia Delhi-a Governor zinin prime minister Narendra Modi hnenah Mizoramin AIIMS damdawi-in anga changtlung a neih theihna turin hma a la tih an sawi a, "A hmalakna azarah Mizoram chuan AIIMS tlukpui damdawi-in ṭha tak kan neih thuai kan beisei tlat a ni," an ti.

BJP chuan, kum 2018 Assembly inthlanpuiah Silchar-Aizawl four lane-a siam turin election manifesto-ah an dah tih sawiin, "BJP chu Mizo mipuite'n min thlang tling rih lo mah se, kum 2019-a Home minister Amit Shah-a'n Aizawl a rawn tlawh khan Mizoram mamawh eng emaw zat ziakin kan lo pe. Chu'ng zingah chuan Silchar-Aizawl four lane-a siam te, Lengpui Airport chu international airport atana tihchangtlun leh AIIMS dinte a tel," an ti.

Amit Shah hnena Mizoram mamawh hrang hrang an thlente chu Mizoram BJP president Vanlalhmuaka'n Governor PS Shreedharan Pillai nen an inkawmna hmasa berah a hrilh nghal tih sawiin BJP chuan, "Mizoram mamawh Central-a kan thlente chu bawhzuisak turin a ngen a ni," an ti a; an ngennate hriaa Governor-in a bawhzui chu fakawm an tih thu an sawi.

Mizoram BJP tarlan danin, Governor hmalakna avangin Silchar-Aizawl four lane-a siam chu sorkar laipuiin a pawm tawh a ni.