Mizoram Anti Tobacco Day hmang Vaihlo that lohzia pulpitah sawi tam ni se - CM
Mizoram State Tobacco Control Society (MSTCS) huaihawtin nimin khan Tourist Lodge, Chaltlangah Mizoram Anti Tobacco Day vawi thumna hman a ni. Khuallian, chief minister Lal Thanhawla chuan, zûk leh hmuam ṭhat lohzia chu pulpitah sawi tam ni se a duh thu a sawi.
Chief Minister chuan, vaihlo ṭhat lohzia inzirtirna pulpitah sawi tam a duh thu sawiin, "Pulpit aṭangin mipuiin hre tam ila awmzia a nei ang. Mahse, kan la sawi tam lo," a ti a; chutih rualin, kohhrante'n ṭan an lak mek thu a sawi.
Mizote'n Pathian ringtu an nihna an chhuang hle nia sawiin, CM Hawla chuan, "Mahse, ringtu kan nihna hi kan hmang rim lo hle a, Chawlhnia inkhawm nan chauh emaw kan ti a ni," a ti a; ringtu nihna aṭanga thlirin, cancer leh HIV/AIDS vei tam lamah Mizoram chu India rama a sang berte zinga mi a nih chu zah a hun tawh thu a sawi.
Lal Thanhawla chuan, ram dangah sikul uniform ha chunga mei zù a hmu ngai loh thu sawiin, "Mizoramah chiah school uniform ha chunga mei zù ka hmu ṭhin. Zirtirtute hi zirlaite tan role model an nih a ngai," a ti a; zirtirtute chu zûk leh hmuam leh kawng engkimah an zirlaite entawn tlaka inuluk turin a chah.
CM Lal Thanhawla chuan, zûk leh hmuam ti lo pung zel mah se, Mizoramin hma a sâwn chak lo tih sawiin, nasa zawka
ṭan lak a ngaih thu a sawi a, "Zûk leh hmuam hi a aia ṭha lo zawk zu leh sa, drugs gateway (kalkawng) a ni," a ti.
Chief Minister chuan, dan loa zûk leh hmuam tite man turin police zawng zawng thuneihna pek an nih thu a sawi a, "State dangah hetiang hi ti an awm ve lo; mipui kan hmangaih vang a ni," a ti. Mizoram chu ṭhangtharteah zûk leh hmuam ti awm lohna rama siam turin Mizo mipui zawng zawng
ṭan rual a ngaih thu a sawi.
Anti Tobacco Day hi September 11 a ni a, kum 2014-ah hman ṭan a ni. Kuminah chuan Pathianniah a tlak avangin nimin khan hman a ni a, thupui chu 'Tobacco free generation' tih a ni.
Anti Tobacco Day hmannaah Aizawl District Anti Tobacco Squad chairman Kannan Gopinathan, Aizawl DC kaihhruaiin zûk leh hmuam donaa thawk ṭhate hnenah Outstanding Award for Exemplary Performance hlan a ni a; Health principal director Dr K Ropari kaihhruaiin thutiam sawi rual a ni.
Indian Society on Tobacco and Health (Mizoram Chapter) presi-dent Lal Riliani'n thu a sawi bakah, National Tobacco Control Prog-ramme-a state nodal officer Dr Jane R Ralte-in thupui a sawi.
Anti Tobacco Day hi Lungleiah pawh hman a ni a; Lunglei District Anti Tobacco Squad, Legal Metrology leh police-te'n dan loa zawrh meizial báwm 369 an man an ni.
Siahaah chuan DC conference hall-ah hman a ni a, DC Harleen Kaur khuallian a ni. An tarlan danin, Siaha district ATS-in August 1, 2015 leh August 1, 2016 inkarah squad drive vawi 42 neiin, COTPA dan bawhchhia mi 263 an man a, pawisa chawitir tlingkhawm chu Rs. 14,940 a ni. TCC-ah mi 309, mipa 168 leh hmeichhia 141 an inentir a, chung zinga 7.59% chuan zuk leh hmuam an bànsan. Inkhawm zawhah Siaha High School zirlaite'n “Tobacco Free Generation Cleanliness Rally' an nei bawk.
Kolasib-ah pawh DC pisa tualah leh Kolasib College-ah hman a ni a, DC H Lalengmawia'n a hmanpui. Kolasib DC pisa tualah hian dan loa meizial zawrh man tawh foreign cigarette carton 75 leh pack 10 leh churut 84 hâl a ni a; Kolasib College-ah chuan zûk leh hmuamin taksa leh hriselna a tihchhiat theih dante inzirtir a ni.
Vaihlo donaa thawk Ṭha award dawngte
Damdawi-in - Aizawl Civil Hospital
Sorkar pisa - Forensic Science Laboratory
Sikul - Durtlang Middle School-II & Saitual P/S-III
TV channel - ZONET Senhri & ZONET Naubân
NGO - Kanan Veng Branch YMA, Aizawl