Thei leh thlai hralh dan tur sawiho

Mizoram sorkar leh United Nations Development Programme (UNDP) ṭangkawp chuan, Thawhṭanni tlai khan Aijal Club-ah Mizorama thlai leh thei thar (horticulture product)-te state páwna hralh chhuahna tur zawn rûnpui, 'Buyers-Sellers Meet' an buatsaih a; Finance minister Lalsawta leh Horticulture minister PC Lalthanliana ten an hmanpui.

Finance Minister chuan, Buyers-Sellers Meet chuan Mizorama kut hnathawktute tan malsawmna a thlen ngei a beisei thu sawiin, "Insumdawn tawnna changtlung tak nei tur chuan Mizoramin hlawm tam tham tak hralh tur kan neih a ṭul," a ti a; thlai leh thei hralh chhuah tur neite chu company-te mamawh phuhru tura ṭan la turin a chah.

Industry lamah state dangte nen khâi-khinin Mizoram a hnufûm thu sawiin Lalsawta chuan, "Industry lamah hnufûm mah ila, theihna kan neihnate hi ram hmasawnna hnárkaitua siam turin tih tak takna nen sorkar leh kut hnathawktute ṭanho a pawimawh. Mizoram hi mahni ei khawp thawk chhuak mai ni loin, sumdawnna hmunpuiah kan inhlángkai thei ang," a ti.

Finance Minister hian UNDP-in consultant atana a rawih Yes Bank leh Mizoram sorkar ṭangkawp buatsaih 'Potential Opportunities for Horticulture Produce in Mizoram' tih a tlangzarh a ni.

Horticulture minister PC Lalthanliana chuan, Mizoram thlai leh theite chu chemical hlauhawm leh heavy metal tel lo a nih thu sawiin, "Tunlai thiamna hmanga zir chianna neih hnuin, variety ṭha zawk leh tam zawk thar chhuak tura sorkar puihna nen kut hnathawktute tan hmalak ṭhin a ni. Insumdawn tawnna ṭha tak nei tura kut hnathawktute leh company-te'n inthlunzawmna siam theih Mizoram sorkarin a duh a ni," a ti.

Meet-ah hian chief secretary Lalmalsawma kaihhruaina hnuaiah Mizoram horticulture product-te hralh chhuahna tur market nei thei tura potential buyer company 12 sawm chhuahte leh hralh tur nei pawl panga thlante leh a kaihhnawih sorkar department hrang hrangte'n thil pawimawhte an sawiho.

Potential buyer sawm chhuahte chu - Coca Cola, Louis Dreyfus, Field Fresh Foods Ltd., Organic India, Sunflag Agrotech, Sresta Organic, Omnikan Earth Science, Suminter India Organics, Access Development Services, Haldiram, Keventer Agro leh Paras Spices te an ni.