Staff nurse la ṭha leh turin MPSC phût

MZP chuan thuchhuah siamin, tun hnaia MPSC-in Mizoram sorkara thawk tur staff nurse a lak danah thil dik lo a awm ngei nia an hriat thu an tarlang a; dik taka la ṭha leh turin MPSC an phût.

MZP chuan, MPSC-in staff nurse tur a laknaah chhungkhat induhsakna uchuak tak a awm ngeia an hriat thu sawiin, "Kan duh lo tak zet a, a rang thei ang bera cancel a, a thara dik leh felfai taka hna zahawm tak thawk tur hi la ṭha leh turin MPSC kan phût," an ti. An ngennain awmzia a neih loh chuan a tàwp thlengin dik lo do tura an kal dawn thu an puang.

MZP tarlan danin, staff nurse hi diltu mi 860 an awm a, MPSC-in dil dan dik loh vangin mi 62 an hnâwl a, mi dang 260 chu interview-ah an inlan lo. Mi 538-in interview an hmachhawn a, chuta ṭang chuan mi 25 lak niin, panel list-ah mi pakua an awm.

Staff nurse lak turah hian Health Minister-in Congress Bhavan-a a thu sawinaah, hun rei tak a nghet loa thawk tawhte dah nghehna tur leh duhsak bik awm loa dik leh felfai taka lak a nih tur thu a lo sawi tawh tih sawiin, MZP chuan, "Interview result a chhuak a, senior zawk tam tak la si loa MPSC chairman PC Lawmkunga monu, kum thum chauh private hospital-a la thawk leh a ṭhiannu kum nga chauh private hospital-a thawkte lak an ni hi ṭha kan ti lo," an ti.

MZP chuan, MPSC Chairman chu MPSC-ah Manipur ze ṭha lo seng lut lo turin an chah a; thil ṭha lo a awm tawh chuan MPSC hna lak reng rengah inthamna a awm thei tawh dawn avangin mipuiin MPSC-ah rinna an nghah loh phah an hlauhthawn thu an sawi.