YMA CCC-in rorel agenda turte an thlang

YMA-a rorelna sang ber dawttu, Central Coordination Committee (CCC) chu nimin khan Central YMA Hall-ah president Lal-biakzuala kaihhruaiin an ṭhu a; October thlaa YMA rorel inkhawm neih huna agenda atana CEC, sub-headquarters leh group-te'n thu an thehluhte sawihoin an thlang fel.

YMA CCC meeting-ah CYMA office bearer paruk, CEC member 33, sub-headquarters hruaitu 17, group hruaitu 51 leh Aizawl khawpui branch aiawh 66 an tel a; an vaiin mi 173 an ni.

CCC meeting chuan kumpuan atana bûk turin 'Ruihhlo do', 'Ram leh hnam humhalh', 'Khawtlang nun siamṭhat' leh 'Zirna uar kum' tihte an thlang a; kum 2017-a general conference thlen dil aṭangin bûk turin Champhai Zotlang ‘E’ Branch leh Zawlbuk Group YMA-te an thlang.

YMA Rorel Inkhawm Agenda turte

YMA KHAWIH

1. Central service-ah Mizote tam zawk an luh theih nan CYMA-in hma la rawh se.

2. Mizoram hmun hrang hranga kan pipute hmun hlui leh sûlhnûte hi a nih phung hloh loa humhalh a nih theih nan CYMA-in hma la rawh se.

3. Mizoramin Trading Regulation Act ṭha leh mumal zawk a neih theih nan CYMA-in hma la rawh se.

4. Zo hnahthlakte tun aia kan inpumkhat lehzual theih nan CYMA-in hma la rawh se.

SORKAR KHAWIH

1. YMA hmun lo ram (land lease) kan neihte hi sorkar aṭanga leiman chhiah âwl a nih theih nan CYMA-in kawng zawng rawh se.

2. Mizo hnam ziarâng/hnam lâmte hi member náwlpuite'n kan thiam theih nan zirna in hrang hrangah sorkarin zirtir dan ngaihtuah rawh se.

3. Luidung nungchate humhalhna dan a awm theih nan CYMA-in sorkarah thlenin hma la rawh se.

4. State Referal Hospital bul hnaiah damlo enkawltute tan ‘Khualbuk’ sak a nih theih nan YMA-in hma la rawh se.

5. ILP chungchangah sorkarin mumal zawka kalphung thar a siam theih nan hmalak ni rawh se.