16th Finance Commission rawn zin

Sorkar laipuia 16th Finance Commission (XVI-FC) chuan an chairman Dr Arvind Panagariya hoin nimin khan Aizawl an rawn thleng a, Hunthar Venga lei tlahniam ṭhin an tlawh nghal.

XVI-FC hotute hi Lengpui Airport-ah minister Dr Vanlalthlana, adviser to CM TBC Lalvenchhunga, chief secretary Khilli Ram Meena, PWD, Disaster Management & Rehabilitation department leh Geology & Mining department hotute'n an lo dawngsawng.

Finance Commission hotute hi Hunthar Venga lei tlahniam tlawhpui nghal an ni a; DMR leh PWD hotute'n kum 1990 aṭanga 2024 chhunga leilung chêt dan leh inkalpawhna kawnga a thlen tawh dan te, lei tawlh hniam zel tur venna atana hmalakna tawh dante an hrilh. Lei a tawlh tawh lohna tura hmalak dan tur ṭha nia an hriatte an sawi bawk.

Hunthar Venga lei tlahniam nghawng zau zawng chu hectare 24.3 a ni tarlan a ni a; PWD chuan lei chetna zau zawka dâwm a nih theih nan cheng vbc. 77 hû project an lo thlen a, DMR department-in nuai 800 hû project an lo thlen bawk nia thu dawn a ni.

Mizoram rawn tlawhtu XVI-FC team-te chu chairman Dr Arvind Panagariya hoin member - Ajay Narayan Jha, Annie George Mathew leh Dr Manoj Panda te bakah, XVI-FC secretary Ritvik Pandey leh hotu dangte an ni.

XVI-FC team hi Mizoramah ni li an chám dawn a; an chàm chhungin Secretariate conference hall-ah Chief Minister leh Mizoram sorkara officer liante nen an inkawm dawn bakah, Chief Secretary conference room-ah CM hoin inkawmna hun hman a ni ang. Press conference an nei dawn a, political party aiawh te, district council aiawh te, local council aiawhte an kawm dawn bakah, Zoram Medical College & Hospital leh Falkawn an tlawh bawk ang.