NH siamah chak taka hma la turin Governor-in NHIDCL hotute a hrilh

Governor Gen. Vijay Kumar Singh chuan February 22, Inrinni khan Kolasib leh Vairengte a tlawh a; Kolasib district-a national highway thawm ṭhat hna kal muangin mipui tan harsatna nasa tak a thlen thu sawiin, chak taka hma la turin NHIDCL leh contractor hotute a hrilh.

Larsap hian Vairengtea Counter Insurgency and Jungle Warfare School (CIJWS) a tlawh a; CIJWS commandant Maj. Gen. VK Nambiar chuan lo dawngsawngin, CIJWS kalphung leh sipai hnena zirtirna an pek dan tlangpuite a tarlang. Lailapur-a CIJWS campus a tlawh tel bawk.

Kolasib DC conference hall-ah sorkar department hotu te, khawtlang leh tlawmngai pawl hruaitute nen an inkawmhonaah Governor chuan, "Kolasib district-a NH thawm ṭhat hna kal muangin mipui harsatna nasa takin a thlen a, NHIDCL hnuaia NH kawngpui thlûr lia laih turah zangnadawmna leh forest clearance chungchangahte harsatna tam tak sutkian a ni tawh," a ti a; Mizoramah hna thawh theih hun chhung a rei loh avangin a rang thei ang bera hma la turin NHIDCL hotute a hrilh a ni.

Dan leh thupek kenkawh kawngah thawktu indaih lo chunga enforcement agency-te'n theihtawp an chhuah ṭhin chu lawmawm a tih thu sawiin Gen. VK Singh chuan, "Ṭhalaite nun tibuaia ram tana hmelma lian tak ni mek ruihhlo donaah ṭan lak lehzual a ṭul a, ruihhlo tawlhrûk eng emaw zat man ni mah se, man loha kaltlang a awm nual avangin kan ṭanrual a ṭul a ni," a ti.

Governor chuan, sorkar laipuiin mipui hamṭhatna tura scheme a duante mipui hnena thlen a, a nih tur ang taka kalpui chu sorkar hnathawkte tihmâkmawh a nih thu sawiin, "Kan hnathawh dan leh thlen chinte chiang zawka kan hriat theih nan leh awmze nei zawka hma kan lak theih nan dashboard fel tak neih a, kan inbihchian fo a pawimawh," a ti a; sorkar hnathawkte chu an hnaah rinawm taka thawk turin a chah.

Lo neih leh huan thlai siamah ṭan lak lehzual a ngai tih sawiin Larsap chuan, "Thar chhuah mai ni lo, a hralhna tur lam thlenga kan ngaihtuah tel a ngai. Nakin hun daih tur lo neih dan ṭha zawk leh hlawk zawk kan ngaihtuah a pawimawh a, mithiamte'n loneitute an puih a ṭul," a ti.

Governor hian sorkar hnathawk, khawtlang leh tlawmngai pawlte chu mipui rawngbawltu an ni tih inhria a, mipui hamṭhatna atan theihtawp chhuah turin a fuih a ni.