Minister-in Aizawla hnathawhte a enfiah; Ṭang lehzual turin contractor-te a chah

Urban Development and Poverty Alleviation (UDPA) minister K Sapdanga chuan February 22, Inrinni khan Aizawla hmun pariatah UDPA department hnuaia hnathawhte a enfiah a; hmun ṭhenkhata contractor-te chu ṭang lehzuala hna thawk turin a chah.

K Sapdanga chuan, hnathawh mekte hi a ṭha tlang viaua a riat thu sawiin, ṭha taka chhunzawm turin contractor-te a chah a; chutih rualin, hna ṭhenkhatah ṭan lak ngai deuh a awm tih sawiin, chu'nga hna thawktu contractor-te chu ṭang lehzuala thawk a, rintlak taka siamte turin a chah a ni.

Kum 2018-a hna thawh ṭan tawh Zodin Multi Level Parking cum Utility Centre chu mipuiin an nghahhlelh tawh thu sawiin UDPA Minister chuan, ṭang lehzuala thawk turin contractor a hrilh.

Zodin Multi Level Parking cum Utility Centre sakah hian smart transformer bun leh robotic parking chu a ṭhat leh ṭhat loh enchhin la hmabak a ni a; chu'ng hmabakte chu a rang thei anga thawk turin UDPA department official-te leh contractor-te chu a hriattir a ni.

UDPA Minister hi UDPA secretary Lalmalsawma Pachuau leh director Jacob Lalawmpuia bakah, PWD hotute leh official dangte'n an ṭawiawm.