HC Judge-in Champhai Court a tlawh

Gauhati High Court judge Justice Marli Vankung chuan February 22, Inrinni khan Champhai District Court a tlawh a, Champhai leh Khawzawl district court sakna tur hmun a enfiah. Champhai District Court-ah December 2024 aṭanga January 2025 chhungin thubuai 241 chinfel a ni tih tarlan a ni.

Justice Marli Vankung-in Champhai District Court a tlawhnaah district & sessions judge Liansangzuala'n Champhai Judicial District dinhmun a sawifiah. Champhai District Court-ah December 2024 leh January 2025 chhungin thubuai 241 chinfel a, thubuai kal lai 647 a awm. Thubuai kal lai zinga 344 (53%) chu ruihhlo kaihhnawih (NDPS Act) thubuai a nih thu a tarlang.

Champhai Judicial District hi November 11, 2021 khan hawn niin, District & Sessions Judge hoin civil judge senior division (chief judicial magistrate) pakhat leh civil judge junior division (judicial magistrate first class) pakhatin an ṭhut chilh mek. Judge post pasarih zinga pali leh supporting staff post 23 zinga 10 a ruak mek a ni.

Justice Marli Vankung chuan Champhai Vengsanga District Court sak mek leh Champhai Dinthara judicial quarters sakna tur hmun a tlawh. District Court chu 42% thawh zawh a ni tawh a, quarters chu grade-II pahnih leh grade-III pahnih sa turin ruahmanna siam a ni.