KHAWTHLIR

Chetsualnaah thi

February 22, Inrinni zan dar 7:50 vel khan Tuivai lui leh New Vervek inkarah lirthei chesualin, kawng thlangah a lum a, lirtheia chuang V Lalhmingthanga (55) h/o Lalthantlingi, Sakawrdai chu a hmunah a thi. Thu dawn danin, lirthei hi Lalawmpuia, Sakawrdai ta a ni a, mi panga an chuang. Lirtheia chuang dangte pawh an hliam a, ngaihtuahawm erawh an awm lo.

Khawbelah in kâng

Nimin chawhma dar 10:15 khan Khawbel, Serchhip district-a David Lalchhuanmawia in Assam type chu a kâng a, bungraw chuh hman lohin a kâng ral. In kan lai hian a neitute an awm lo a, a kan chhan hriat a ni lo.

MZU-ah DIA-CoE

Mizoram University vice chancellor Dr Dibakar Chandra Deka leh Defence Research and Development Organisation (DRDO) hnuaia DFTM director Dr N Ranjana chuan February 22, Inrinni khan MZU-ah DRDO-Industry-Academia-Center of Excellence (DIA-CoE) office an hawng. MZU-a DIA-CoE hi India hmarchhak biala a hmasa ber a nia tarlan a ni.

Lirthei tlan khap

Mamit SP Pukhraj Kamal chuan hriattirna chhuahin, Lengpui - Saiphal Bamboo Plantation Road chu PM-DiVINE Pilot Project hnuaiah thawm ṭhat mek a nih avangin Lengpui - Saiphal Bamboo Plantation Road, West Serzawl péng aṭanga Chengkawl lui inkarah February 22 aṭanga March 31, 2025 thleng lirthei tlan khap a nih thu a tarlang.

Hnahthialah kawngzawh

Hnahthial District Hub for Empowerment of Women chuan February 22, Inrinni zing khan 'One Nation, One Helpline Rally' an huaihawt a, Hnahthial additional SP Lalhmangaihhlua'n hmanpuiin, kawngzawh turte a vailiam. Women and Child department hnuaia District Child Protection Unit, One Stop Centre leh District Hub for Empowerment of Women-a thawk te, YMA, VC leh Home department aiawhte an tel a ni.

Tuivai lei dawh vangin lawm

Hmar Students' Association (HSA) chuan thuchhuah siamin, Mizoram leh Manipur inkalpawhna Tuivai lei hlawhtling tak leh rang taka dawh zawh a nih avangin Mizoram sorkar, chief minister Lalduhoma leh hma latu dangte chungah an lawm thu an tarlang. HSA chuan, "He hmalakna pawimawh tak hian Mizoram páwn leh chhunga awm Mizo hnamte tana inpekzawhna leh an sorkarna hlawhtlinzia entirna pawimawh tak a ni," an ti.