Zu zawrh duh lohna kawngzawh Tihrêm theih inrin vanga Khap duh kan ni lo: Zorama

MNF party chuan nimin khan Aizawl leh district khawpui hrang hrangah 'Zu zawrh duh lohna kawngzawh' an huaihawt. MNF president Zoramthanga chuan, zu chu Mizoramah tihrêm vek theih an inrin vanga khap duh an ni lo a, sualna tipungtu a nih vanga duh lo an nih thu a sawi.

Aizawlah chuan kawng zawh hi Chanmari kawnah an ṭan a, MNF senior vice presi-dent Tawnluia'n thu a sawi. Zarkawt kawnah MNF general secretary Lalruatkima, MLA-in thu sawiin, Israel Point-ah president Zoramthanga'n thu a sawi a; an tàwpna, Vanapa Hall kawtah vice president Dr R Lalthangliana'n thu a sawi bawk.

MNF President chuan, "Zu hi tirêm vek thei lo mah ila, theihtawpa kan do a ṭul. Rûkrûk, sualna dangte hi tirêm vek thei lo mah ila, theihtawpa kan do a ngai. Zu hi tihrêm vek theih inringa khap duh kan ni lo a, sualna tipungtu a nih avangin kan duh lo a ni," a ti.

Zoramthanga chuan, Cong-ress sorkar chu Mizoramah zu in titam tura theihtawpa hma laah puhin, "A chhe lai siam ṭha a, dái theu tura mi heti zat kan la awm hi a lawmawm," a ti.

Congress sorkarin zu an zawrh vangin mitthi an tam phah nia sawiin, kumina thla riat chhungin Aizawla Assembly bial 11 huam chhungah zu kaihhnawihah mi 500 chuang an thih thu leh, Lunglei Civil Hospital-ah September 14, 2016 darkar 24 chhungin zu vanga enkawl ngai mi 30 an lut hman niin MNF president chuan a sawi.

Sorkarin zu a zawrh chhan-te sawiin, Zorama chuan, "Zu chhiah ît vang a ni a, zu chhiah-ah cheng vbc. 80-100 inkar an la ta ngei a, mahse, zu manah ram pawnah cheng vbc. 500 chuang a chhuak thung. Rs. 10 bo zawn nana Rs. 50 sên ang a ni," a ti.

Zu in mite'n zu ṭha zawk an in theih nan an zuar a, mahse, phai lama an zu duh tawh loh zu ṭha lo zawk an zuar nia sawiin, "A intute'n an tuar a, an zu ṭha zawk zawrh hi a fail lailet dêr a ni," a ti. Zu zawrh vangin damdawi hmang an tlem phah lo a, an tam sawt zawk niin a sawi bawk.

Zu zawrh chungchanga Congress sorkar hotute'n 'Kohhran kan ráwn dawn lo,' tih te, 'Zu zawrh hi kohhrante
ṭawngṭai chhanna a ni,' an tihte chu kohhran hmuhsitna a nih thu sawiin, MNF President chuan, "Kohhran leh kan sakhua an beiin an hmusit lutuk. Congress hripui a léng a, kan thi zawih zawih mai a ni. Congress hi chu kiang tawh rawh se kan ti a ni," a ti.

Kawngzawhnaah hian 'MNF a sorkar veleh zu zawrh kan titawp ang,' tih te, 'Zu man tlingkhawma Mizoram enkawl kan duh lo,' tih te, 'Zu hmanga ṭhangtharte nun tichhetu Congress sorkar kan duh lo, báng rawh se,' tih te, Congress sorkar zu zawrh hi kohhran ṭawngṭai chhanna a ni lo,' tih te, 'Zu hmanga intihausa Congress lal chhungkaw sorkar kan ning tawh, báng rawh se,' tih te, 'Zu leh drugs hluarna rama min siamtu Congress sorkar báng rawh se,' titein an aurual a ni.

Zu zawrh duh lohna kawng-zawh hi Lunglei, Serchhip, Kolasib, Champhai leh Mamit-ahte pawh neih a ni a; MLPC Act hman lohna district pahnih Siaha leh Lawngtlaiah chuan MNF-te'n poster an tár a, an pungkhawm ve bawk.