Himpuia leh NEC Secretary an inkâwm

Parliamentary secretary (Industries) Joseph Lalhimpuia chuan, Nilaini khan NEC secretary Ram Muivah chu a pisaah a kâwm a, Commerce and Integrated Industrial promotion Centre (IIPC), Chal-tlanga sakna tur atana sum mamawh cheng nuai 963.52 dilna a sawipui.

Joseph Lalhimpuia chuan, Mizoramah kuthna-thawktute'n an siam chhuah, a bik takin handloom leh handicraft pho chhuahna tur leh inzawrhna atan exhibition hall leh emporium an mamawh thu a sawi a; an project thehluh chu a hlawhtlinna atana theihtawp chhuahpui turin a ngen.

Ram Muivah chuan, NEC-in budget an neih tam loh thu sawiin, "Kum khatah cheng vbc. 800 chauh kan dawng a, vbc. 150 chu a hmanna tura ruahman sa a ni. A bâng la awm vbc. 650 aṭanga 80% vel chu project kal lai chhunzawm nan hman a ni a; a la bâng chauh hi project thar atan hman theih a ni," a ti.

NEC Secretary chuan, NEC-in sum tam zawk a neih theihna atan Mizoram sorkar pawhin theihtawp chhuahpui se a duh thu Joseph Lalhimpuia a hrilh a ni.