Zu tihbo theih ka duh- Zira

Serchhip District Jail, Chhiahtlanga mi chu nimin khan hawn a ni a; a hawngtu, Home minister R Lalzirliana chuan, zu zawrh duh lo berte zinga mi a nih thu sawiin, "Zu hi tibo hmiah thei ila ka duh a, a hlawhtlin lohzia chu a hretute kan ni," a ti.

Home Minister chuan, "Zu hi kan duh reng vanga zuar kan ni lo a, a chhiah kan ît vang pawh a ni lo," a ti a; zu chu a duh lote'n an in atan ni loin, a in
ṭhinte'n zu ṭha an in theih nana phalna neia zawrh a nih thu a sawi.

Mizorama sualna tam tak kai chhuaktu ruihhlo do beihpui thlakna kalpui mek a nih thu sawiin, R Lalzirliana chuan, "Ruihhlo do beihpui thlak nan hian YMA, Excise leh Police department-te thawkhoin, sorkar pawhin hemi atan hian sum a pe ṭheuh tawh," a ti a; khawtlang nu leh pa, tlawmngai pawl leh kohhran hruaitute chu ruihhlo beihpui thlaknaa thawhpuiah a sáwm.

Home Minister chuan, Serchhip District Jail hawn tâk chu sorkar hma-sain bul an ṭan tawh, Congress sorkarin a chhun-zawm a nih thu sawiin, "Bul lo
ṭantute chungah leh hawn theiha peih a nih theih nan thâ thawhtute zawng zawng chungah lawmthu ka sawi a ni," a ti.

Serchhip District Jail hawnna inkhawm hi Home additional secre-tary Lalbiakzama'n a kaihruai a; Vanlalawmpuii Chawngthu, MLA leh Serchhip DC Dr Lalrozama te pawhin thu an sawi.

Inspector General of Prison, Zoramthangi Hau-hnar tarlan danin, Ser-chhip District Jail hi Chhiahtlang khawtlangin a hmun tur ram an pekah kum 2002-ah Prison Moder-nisation Scheme sum nuai 270 hmanga bul ṭan a ni a; kum 2011-2014 chhungin 13th. Finance Commission sum nuai 416 hmangin chhunzawm a ni. Jail-ah hian mipa 125 leh hmeichhia 40, an vaiin mi 165 vel táng thei tura ngaih a ni.