KHAWTHLIR

Ram pe

Rothangpuia (RTP), Tuikual, Aizawl chuan Lunglei Bazar Venga an ram chu motor kawng atan a pe a; nimin khan a fapate pahnih Zodin-tluanga (UDPA minister) leh Chalrosanga Ralte (bialtu MLA) te hoin Lunglei Bazar Veng NGO Coordination Committee-te'n an enfiah. Bialtu MLA hian kawng siamna atan Rs. 2,00,000 a thawh nghal a ni.

Thisen pe

Chaltlang Higher Secondary School chuan, nimin khan Aizawl Civil Hospital tan thisen unit 72 an pe a, a petute mipa 68 leh hmeichhia pariat an ni. Doordarshan Kendra, Aizawla thawkten Doordarshan kum 57-na pualin nimin khan Synod Hospital tan thisen unit 26 an pe a, a petute mipa 24 leh hmeichhia pahnih an ni. Southern Institute of Hotel Management, Lunglei zirlai mipa pali leh hmeichhia pathumte'n Lunglei Civil Hospital-ah thisen unit sarih an pe bawk.

Free clinic

National Mental Health Programme, Healh department leh Life for Comprehensive Development ṭangkawp chuan, nimin khan Aizawl West College-ah 'Mental Health Awarness and Free Clinic' an buatsaih a, mi 95 an inentir. Inkhawmah hian rilru lama harsatna neite puitu tur din thar, Aizawl West College Green Ribbon Club pawh hawn nghal a ni.

Jail-ah khung

September 11, 2016 zana Lunglei district chhung, South Khawlêk-a Sui-lianmawii (33) w/o Cheuva leh a fapa Lalmuanpuia (5)-te thattua puh Isaak Lalrinmawia (20) s/o Lalremruata, South Khawlêk chu September 14 khan magistrate thu angin Lunglei District Jail-ah khung a ni. Isak Lalrinmawia hi tualthah thubuai bakah, pawngsual thubuai siamsak a nia thu dawn a ni.

NLUP sem

AH&Vety department chuan, tun kar chhungin khan Mamit district chhunga NLUP hnuai-a vawk leh bawng vulh thlangtu chhung-kaw 749 hnenah ṭan-
-puina sum an sem. Ṭanpuina atan hian Rs. 2,15,84,000 sem chhuah a ni.