Housing for All inhrilhfiahna buatsaih

Lunglei khawpuia village council leh tlawmngai pawlte tan nimin khan YMA Sub-Headquarters, Lunglei Hall-ah Housing for All / Pradhan Mantri Awas Yojana (PMAY) inhrilhfiahna hun buatsaih a ni a, UDPA minister Zodintluanga'n a hmanpui.

Zodintluanga chuan, V/C leh tlawmngai pawl hruaitute chu chenna in sak tur thlanna kawngah rawngbawlna anga kalpuia enpui turin a ngen a, "Mi harsa tak takte tana tih a ni a, he hmalakna hi rawngbawlna anga kalpuia min enpui turin ka duh che u. Housing for All-ah hian quota a awm lo," a ti.

UDPA Minister sawi danin, bank aṭanga in sakna loan la turte chu pawisa punna zatvein an la thei dawn a, 6.5% interest hi sorkar-in a tum dawn. He hmalakna hi mamawhna ang zela pek tur a ni.

In sakna diltute dilna thehluh zawng zawng chu ennawn leh vek a nih thu sawiin, UDPA Minister chuan, "MLA-te nen secutity neih a ni leh dawn. Mahse, MLA-te hi a thlangtu tur an ni lo a, official-a endiktute data khawn khawm a dik leh dik loh enpuitu tur an ni," a ti.

Zodintluanga chuan, in sak ṭanpuina hi mi harsa tak takte chhâwk zângkhaina tura hmalakna a nih thu sawiin, "Harsatna awm lo thei ang bera a mamawhte tana hmalak a ni a, insiam rem theih chin chinah siam rem tum a ni," a ti a; loan diltu zawng zawngte chu a dik chin chu bank-ah thawn vek a nih dawn thu a sawi.

Bank-in loan an pek theih zat tur hriat a nih loh thu sawiin, UDPA Minister chuan, "Loan diltute'n an hmuh vek theihna atan hmalak a ni ang," a ti.

Inkhawm hi UDPA director Zoram-muana'n a kaihruai a, IEC specialist Michael Lalneihtluanga’n beneficiary led construc-tion chungchang leh MIS specialist Lalfak-zuala’n Credit Link Subsidy Scheme (CLSS) chungchang an sawifiah a ni.